ନୂଆଦିଲ୍ଲୀ: 5 ରାଜ୍ୟରେ ହୋଇଥିବା ବିଧାନସଭା ନିର୍ବାଚନରେ କଂଗ୍ରେସ ଗୋଟିଏ ରାଜ୍ୟର ସରକାର ଗଠନ କରିଥିବା ବେଳେ 4ଟି ରାଜ୍ୟରେ ପରାଜୟ ବରଣ କରିଛି । ରାଜସ୍ଥାନ, ମଧ୍ୟପ୍ରଦେଶ, ମିଜୋରାମ ଓ ଛତିଶଗଡ ବିଧାନସଭା ନିର୍ବାଚନରେ କାହିଁକି ହାରିଲା କଂଗ୍ରେସ ? କେଉଁଠି ରହିଲା ତ୍ରୁଟି ? କଣ ରହିଲା ଭୁଲ ? ତାର କାରଣ ଖୋଜୁଛି ଦଳ । ଏନେଇ ଆଜି ଦିଲ୍ଲୀ ସ୍ଥିତ କଂଗ୍ରେସ ମୁଖ୍ୟାଳୟରେ ବସିବ ବୈଠକ । କେଉଁ କାରଣ ଯୋଗୁଁ ଦଳ ରାଜସ୍ଥାନରେ ଶୋଚନୀୟ ପରାଜୟ ହେଲା ସେନେଇ ଆଲୋଚନା କରାଯିବ । ବର୍ତ୍ତମାନ କାର୍ଯ୍ୟାଳୟରେ କଂଗ୍ରେସ ହାଇକମାଣ୍ଡ ମଲିକାର୍ଜୁନ ଖଡ଼ଗେ ଓ ସାଂସଦ ରାହୁଲ ଗାନ୍ଧୀ ପହଞ୍ଚିସାରିଛନ୍ତି । କିଛି ସମୟ ପରେ ରାଜସ୍ଥାନର ବହୁ କଂଗ୍ରେସ ନେତା ମଧ୍ୟ ଦିଲ୍ଲୀରେ ପହଞ୍ଚିବେ । ଅନ୍ୟପଟେ ମିଜୋରାମରେ କଂଗ୍ରେସର ପରାଜୟକୁ ନେଇ ବୈଠକ ଆରମ୍ଭ ହୋଇଯାଇଛି ।
ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହେଲଟ ଦିଲ୍ଲୀରେ ପହଞ୍ଚିଛନ୍ତି । ସେ କହିଛନ୍ତି ଯେ, ନିର୍ବାଚନ ଫଳାଫଳ ଆସିବାର 7 ଦିନ ପରେ ବିଜେପି ତିନି ରାଜ୍ୟରେ ମୁଖ୍ୟମନ୍ତ୍ରୀ କିଏ ହେବ ତାହା ସ୍ଥିର କରିବାରେ ସକ୍ଷମ ହୋଇନାହିଁ । ବିଜେପି ଦଳରେ କୌଣସି ଶୃଙ୍ଖଳା ନାହିଁ । ଯଦି ଆମେ ସେପରି କରିଥାନ୍ତୁ ତେବେ ସେମାନେ କିପରି ଏହାକୁ ଦର୍ଶାଇଥାନ୍ତା ତାହା ଭାବିବା ବି ଅସମ୍ଭବ । ସେମାନେ ଆମ ବିରୋଧରେ ବହୁ ଅଭିଯୋଗ ଆଣି ଲୋକଙ୍କୁ ବିଭ୍ରାନ୍ତ ମଧ୍ୟ କରିଛନ୍ତି । ଆମେ କିନ୍ତୁ ନୂଆ ସରକାରଙ୍କ ସହଯୋଗ କରିବୁ ।