ରାୟପୁର: ଛତିଶଗଡ ବିଧାନସଭା ନିର୍ବାଚନ ପାଇଁ ଆଜି ଶାସନରେ ଥିବା କଂଗ୍ରେସ ଦ୍ବିତୀୟ ପର୍ଯ୍ୟାୟରେ 53 ପ୍ରାର୍ଥୀଙ୍କ ନାମ ଘୋଷଣା କରିଛି । ଆଜି ପାର୍ଥୀଙ୍କ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ମୋତିଲାଲ ବୋରାଙ୍କ ପୁଅ ଅରୁଣ ବୋରଙ୍କୁ ଦଳ ଦୁର୍ଗ ଆସନରୁ ନିର୍ବାଚନୀ ମୈଦାନକୁ ଓହ୍ଲାଇଛି । ସେହିପରି ପୂର୍ବତନ ରାଜ୍ୟସଭା ସାଂସଦ ଛାୟା ବର୍ମାଙ୍କୁ ଦଳ ଧର୍ଶିଓ୍ବା ବିଧାନସଭା କ୍ଷେତ୍ରରୁ ମୈଦାନକୁ ଓହ୍ଲାଇଛି । ମହନ୍ତରାମ ସୁନ୍ଦର ଦାସଙ୍କୁ ରାୟପୁର ଦକ୍ଷିଣ ଆସନରୁ ବିଜେପି ହେଭିଓ୍ବେଟ ବ୍ରିଜମୋହନ ଅଗ୍ରଓ୍ବାଲଙ୍କ ବିରୋଧରେ ନିର୍ବାଚନ ଲଢାଇବା ନେଇ ଦଳ ନିଷ୍ପତ୍ତି ନେଇଛି ।
90 ଆସନ ବିଶିଷ୍ଟ କଂଗ୍ରେସ ଶାସିତ ଏହି ରାଜ୍ୟରେ ଦୁଇଟି ପର୍ଯ୍ୟାୟ ନଭେମ୍ବର 7 ଓ 17 ତାରିଖରେ ଭୋଟିଂ ହେବାକୁ ଯାଉଛି । ପ୍ରଥମ ପର୍ଯ୍ୟାୟରେ 20ଟି ଆସନ ପାଇଁ ଭୋଟଗ୍ରହଣ ହେବାକୁ ଥିବା ବେଳେ ଦ୍ବିତୀୟ ପର୍ଯ୍ୟାୟରେ ଅବଶିଷ୍ଟ 70 ଆସନରେ ନଭେମ୍ବର 17ରେ ମତଗ୍ରହଣ ହେବ । ଶାସନରେ ଥିବା କଂଗ୍ରେସ ରବିବାର ପ୍ରଥମ ପର୍ଯ୍ୟାୟରେ 30 ପ୍ରାର୍ଥୀ ଘୋଷଣା କରିସାରିଛି । ପ୍ରଥମ ପର୍ଯ୍ୟାୟରେ ମୁଖ୍ୟମନ୍ତ୍ରୀ ଭୂପେଶ ବଘେଲଙ୍କୁ ପାଟନ ବିଧାନସଭା ଆସନରୁ ଟିକେଟ ଦେଇସାରିଛି ଦଳ । ସେହିପରି ଦଳର ଅନ୍ୟତମ ହେଭିଓ୍ବେଟ ତଥା ଉପମୁଖ୍ୟମନ୍ତ୍ରୀ ଟି.ଏନ ସିଂଦେଓଙ୍କୁ ଅମ୍ବିକାପୁର ଆସନରୁ ଦଳ ପ୍ରାର୍ଥୀ କରିଛି ।
2018 ନିର୍ବାଚନରେ କଂଗ୍ରେସ ଏଠାରେ ଏକକ ସଂଖ୍ୟା ଗରିଷ୍ଠତା ହାସଲ କରି ସରକାର ଗଠନ କରିଥିଲା । ମୋଟ 90 ଆସନରୁ 68 ଆସନରେ ବିଜୟୀ ହୋଇଥିଲା କଂଗ୍ରେସ । ଡାକ୍ତର ରମଣ ସିଂଙ୍କ ନେତୃତ୍ବାଧୀନ ବିଜେପି ସରକାରକୁ କ୍ଷମତାକୁ ବେଦଖଲ କରି ଭୂପେଶ ବଘେଲ ମୁଖ୍ୟମନ୍ତ୍ରୀ ହୋଇଥିଲେ । ବିଜେପିକୁ ମାତ୍ର 15ଟି ଆସନରେ ସନ୍ତୁଷ୍ଟ ହେବାକୁ ପଡିଥିଲା । ତେବେ ଚଳିତ ଥର ମଧ୍ୟ ଦଳ କ୍ଷମତା ବଜାୟ ରଖିବା ନେଇ ଆଶାବାଦୀ ରହିଛି । ଦଳର ମୁଖ୍ୟମନ୍ତ୍ରୀ ଚେହେରା ଭୁପେଶ ବଘେଲ ହଁ ରହିବେ ।