ନୂଆଦିଲ୍ଲୀ: କଂଗ୍ରେସ ଅଧକ୍ଷ ନିର୍ବାଚନ ଆରମ୍ଭ ହୋଇଛି । ମଇଦାନରେ ମଲ୍ଲିକାର୍ଜୁନ ଖଡ଼ଗେ ବନାମ ଶଶୀ ଥରୁର୍ । ଦିଲ୍ଲୀ ଏଆଇସିସି କାର୍ଯ୍ୟାଳୟରେ ମତଦାନ ଆରମ୍ଭ ହୋଇଛି । ଏହା ସହ ଦିଲ୍ଲୀ ସମେତ ଦେଶବ୍ୟାପୀ 40 କେନ୍ଦ୍ରରେ ମୋଟ 67ଟି ବୁଥରେ କଂଗ୍ରେସ ମୁଖିଆଙ୍କୁ ବାଛୁଛନ୍ତି 9 ହଜାର 800 କଂଗ୍ରେସ କର୍ମୀ । ସୋନିଆ ଗାନ୍ଧୀ ଓ ପ୍ରିୟଙ୍କା ଗାନ୍ଧୀଙ୍କ ସମେତ 75 ଜଣ ଦଳୀୟ ନେତା ଏଆଇସିସି କାର୍ଯ୍ୟାଳୟରେ ମତଦାନ ସାବ୍ୟସ୍ତ କରୁଛନ୍ତି ।
ଭୋଟିଂ ଆରମ୍ଭ ପୂର୍ବରୁ ଫାଇନାଲ ଯାଞ୍ଚ ହୋଇଥିଲା । କଂଗ୍ରେସ ଦଳର କେନ୍ଦ୍ରୀୟ ନିର୍ବାଚନ ପ୍ରାଧିକରଣ ଅଧ୍ୟକ୍ଷ ମଧୁସୂଦନ ମିସ୍ତ୍ରୀ ଏଆଇସିସି କାର୍ଯ୍ୟାଳୟରେ ନିର୍ବାଚନ ପାଇଁ ଚୂଡ଼ାନ୍ତ ଯାଞ୍ଚ କରଥିଲେ । ଏହାପରେ ସମୟ 10ଟାରୁ ମତଦାନ ଆରମ୍ଭ ହୋଇଛି । ଅପରାହ୍ନ 4ଟା ଯାଏ ଚାଲିବ ମତଦାନ । କଂଗ୍ରେସ ସାଂସଦ ପି ଚିଦାମ୍ବରମ, ଜୟରାମ ରମେଶ ଏବଂ ଅନ୍ୟ ଦଳୀୟ ନେତା ଏଆଇସିସି କାର୍ଯ୍ୟାଳୟରେ ଭୋଟ ଦେଇଛନ୍ତି । ଭାରତ ଯୋଡ ଯାତ୍ରା ପାଇଁ କର୍ଣ୍ଣାଟକରେ ଅଛନ୍ତି ରାହୁଲ ଗାନ୍ଧୀ । ରାହୁଲଙ୍କ ସମେତ ଅନ୍ୟ 40 ନେତା କର୍ଣ୍ଣାଟକର ବେଲାରୀରେ ମତଦାନ କରିବେ । ମଲ୍ଲିକାର୍ଜୁନ ଖଡ଼ଗେ ବେଙ୍ଗାଲୁରୁ ଏବଂ ଶଶୀ ଥରରୁ ଥିରୁଅନନ୍ତପୁରମ ସ୍ଥିତ ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଭୋଟ ଦେଇଛନ୍ତି । କର୍ଣ୍ଣାଟକର କଂଗ୍ରେସ ବୈଠକ ଗୃହକୁ ପୁଲିଂ ବୁଥ କରାଯାଇଛି । ଆସନ୍ତା 19 ତାରିଖରେ ଭୋଟ ଗଣତି ଓ ଫଳ ପ୍ରକାଶ ପାଇବ ।
ମତଦାନ ଆରମ୍ଭ ପରେ ପ୍ରତିକ୍ରିୟା ରଖିଛନ୍ତି ଦୁଇ ପ୍ରତିଦ୍ବନ୍ଦୀ ମଲ୍ଲିକାର୍ଜୁନ ଖଡ଼ଗେ ଓ ଶଶୀ ଥରୁର । ପ୍ରତିକ୍ରିୟାରେ ଶଶୀ ଥରୁର କହିଛନ୍ତି, ''ମୋର ଦୃଢ ବିଶ୍ବାସ ଅଛି । କଂଗ୍ରେସ ଦଳର ଭାଗ୍ୟ ଦଳୀୟ କର୍ମୀଙ୍କ ହାତରେ ରହିଛି । ଦଳର ନେତା ତଥା ପ୍ରତିଷ୍ଠା ଅନ୍ୟ ପ୍ରାର୍ଥୀଙ୍କ ସହ ଅତ୍ୟଧିକ ଥିବାରୁ ଆମ ବିରୋଧରେ ଅଡୁଆ ରହିଛି ।'' ମୋର ବିଶ୍ବାସ କଂଗ୍ରେସ ପୁଣି ଆଗକୁ ଯିବ । ଆଜି ମୁଁ ମଲ୍ଲିକାର୍ଜୁନ ଖଡ଼ଗେଙ୍କ ସହ କଥା ହୋଇ ତାଙ୍କୁ କହିଛି କିଛି ବି ହେଉ ଆମେ ସହକର୍ମୀ ଓ ବନ୍ଧୁ ରହିବା ।''