ନୂଆଦିଲ୍ଲୀ: ଜନ୍ତର-ମନ୍ତର ଠାରେ ଧାରଣାରେ ବସିଥିବା କୁସ୍ତିଯୋଦ୍ଧାଙ୍କ ସମର୍ଥନରେ ଅନେକ ରାଜନୈତିକ ଦଳ ଆଗକୁ ଆସିଛନ୍ତି । ଏହାରି ମଧ୍ୟରେ ଶନିବାର କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ, ସାଂସଦ ଦିପେନ୍ଦର ସିଂହ ହୁଡ୍ଡା ଓ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଜନ୍ତର-ମନ୍ତର ଠାରେ ପହଞ୍ଚି କୁସ୍ତିଯୋଦ୍ଧାଙ୍କୁ ସମର୍ଥନ ଜଣାଇଥିଲେ । ଏହା ପୂର୍ବରୁ ହୁଡ୍ଡା ଶୁକ୍ରବାର ମଧ୍ୟ ଏଠାରେ ପହଞ୍ଚିଥିଲେ । ତେବେ ଭାରତୀୟ କୁସ୍ତି ସଂଘ ଅଧ୍ୟକ୍ଷ ବ୍ରିଜଭୂଷଣ ଶରଣ ସିଂହ ଗିରଫ ନହେବା ପର୍ଯ୍ୟନ୍ତ ଧାରଣା ଜାରି ରଖିବା ପାଇଁ ପୂର୍ବରୁ ଚେତାବନୀ ଦେଇଛନ୍ତି ଏହି କୁସ୍ତିଯୋଦ୍ଧା ମାନେ ।
ଶନିବାର ପ୍ରିୟଙ୍କା ଗାନ୍ଧୀ ଧାରଣାସ୍ଥଳରେ ପହଞ୍ଚି ଧାରଣାରତ କୁସ୍ତିଯୋଦ୍ଧା ବିନେଶ ଫୋଗାଟ, ସାକ୍ଷୀ ମଲିକ ଓ ବଜରଙ୍ଗ ପୁନିଆଙ୍କ ସହ ଦୀର୍ଘ ସମୟ ଧରି ଆଲୋଚନା କରିଥିଲେ । ଏହି ସମୟରେ ସେଠାରେ ଉପସ୍ଥିତ ଥିବା କଂଗ୍ରେସ ସାଂସଦ ଦିପେନ୍ଦର ସିଂହ ହୁଡ୍ଡା ମଧ୍ୟ ଖେଳାଳି ମାନଙ୍କ ସହ ଆଲୋଚନା କରିଥିଲେ । ତେବେ ଏହାପରେ ଗଣମାଧ୍ୟମରେ ପ୍ରତିକ୍ରିୟା ରଖି ମୋଦି ସରକାରଙ୍କ ଉପରେ ବର୍ଷିଥିଲେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ । ସେ କହିଥିଲେ, "ପ୍ରଧାନମନ୍ତ୍ରୀଙ୍କ ଉପରେ ମୋର ଜମା ବି ଭରସା ନାହିଁ । ଯଦି ଦେଶର ଝିଅ ମାନଙ୍କ ପ୍ରତି କିଛି ବି ଚିନ୍ତା ଥାଆନ୍ତା, ତେବେ ସେ ଏଠାକୁ ଆସି ଏମାନଙ୍କ ସହ ଆଲୋଚନା କରିଥାନ୍ତେ । କିନ୍ତୁ ଦେଶର ପ୍ରଧାନମନ୍ତ୍ରୀ ଏପରି କରିନାହାନ୍ତି । କେବଳ ଗୋଟିଏ ବ୍ୟକ୍ତିକୁ ବଞ୍ଚାଇବାକୁ ପୁରା ସରକାର ଲାଗିପଡ଼ିଛି ।"