ରାଞ୍ଚି: ଝାଡ଼ଖଣ୍ଡର ପଶ୍ଚିମ ସିଂହଭୂମି ଜିଲ୍ଲାରେ ନକ୍ସଲଙ୍କ ଗୁଳିରେ ଓଡ଼ିଆ ସିଆରପିଏଫ ଯବାନ ସୁଶାନ୍ତ କୁମାର ଖୁଣ୍ଟିଆ ଶହୀଦ ହୋଇଛନ୍ତି । ରାଞ୍ଚି ସ୍ଥିତ ଚାଇବାସାଠାରେ ଥିବା CRPF ଶିବିରରେ ଶହୀଦ ଯବାନଙ୍କୁ ଶ୍ରଦ୍ଧାଞ୍ଜଳି ଦିଆଯାଇଛି । ଏହାପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ବିଟ୍ ଯୋଗେ ଶହୀଦ ଯବାନଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିବା ସହ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି । ସେପଟେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, ମୁଖ୍ୟ ଶାସନ ସଚିବ, ଗୃହ ସଚିବ, ଡିଜିବିଙ୍କ ସମେତ ସମସ୍ତ ପୋଲିସ କର୍ମଚାରୀ ଉପସ୍ଥିତ ରହି ଶହୀଦଙ୍କୁ ଶେଷ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ।
ନବୀନ ପଟ୍ଟନାୟକ ଟ୍ବିଟ୍ କରି ଲେଖିଛନ୍ତି,"ନକ୍ସଲ ଆକ୍ରମଣରେ ଓଡ଼ିଆ ସିଆରପିଏଫ ଯବାନ ସୁଶାନ୍ତ ଖୁଣ୍ଟିଆ ଶହୀଦ ହୋଇଥିବା ଖବର ବିଷୟରେ ଜାଣି ମୁଁ ଦୁଃଖିତ । ମାଟି ମା’ର ସେବାରେ ତାଙ୍କର ବଳିଦାନ ସର୍ବଦା ସ୍ମରଣୀୟ ରହିବ। ବୀର ଯବାନଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ମୋର ସମବେଦନା ଜଣାଉଛି ।"
ଏହି ଦୁଃଖଦ ଘଟଣା ନେଇ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ମଧ୍ୟ ଟ୍ବିଟ୍ ଯୋଗେ ଶୋକ ପ୍ରକାଶ କରିଛନ୍ତି । ସେ କହିଛନ୍ତି, "ପଶ୍ଚିମ ସିଂହଭୂମି ଜିଲ୍ଲାରେ ନକ୍ସଲଙ୍କ ଗୁଳିରେ ଶହୀଦ ହୋଇଥିବା CRPF ଯବାନ ସୁଶାନ୍ତ କୁମାରଙ୍କୁ ଶତଶତ ପ୍ରଣାମ । ଇଶ୍ବର ବୀର ଶହୀଦଙ୍କ ଅମର ଆତ୍ମାକୁ ଶାନ୍ତି ଦିଅନ୍ତୁ । ଏଭଳି ମୂହୁର୍ତ୍ତରେ ଶୋକସନ୍ତପ୍ତ ପରିବାରକୁ ଧର୍ଯ୍ୟ ଏବଂ ଶକ୍ତି ଦିଅନ୍ତୁ ।" ଶହୀଦ ଯବାନ କେନ୍ଦୁଝର ଜିଲ୍ଲା ଆନନ୍ଦପୁର ପୌରପାଳିକା ୪ ୱାର୍ଡର ବାସିନ୍ଦା ଥିଲେ । ତାଙ୍କ ବାପାଙ୍କ ନାମ ଅତୁଳ ଖୁଣ୍ଟିଆ । କିଛି ବର୍ଷ ଅନ୍ତରେ ତାଙ୍କର ଦୁଇ ଭାଇ ସ୍ବର୍ଗବାସ କରିଛନ୍ତି । ଏବେ ସୁଶାନ୍ତଙ୍କ ଶହୀଦ ଖବରରେ ପୁରା ପରିବାର ଭାଙ୍ଗି ପଡ଼ିଛି । ସୁଶାନ୍ତ କୁମାର ଖୁଣ୍ଟିଆ ୨୦୧୧ ମସିହାରେ CRPFରେ ଯୋଗ ଦେଇଥିଲେ । ସେ CRPF ୬୦ ବାଟାଲିୟନର ବିଡିଏମ ଟିମ୍ରେ ସାମିଲ ଥିଲେ । CRPFରେ ଯୋଗଦେବା ପରେ ଅନେକ ଦୁଃସାହସିକ ଅପରେସନ କରି ସଫଳ ହୋଇଥିଲେ । ନକ୍ସଲଙ୍କ ଦ୍ବାରା ଖଞ୍ଜା ଯାଇଥିବା ଆଇଇଡି ବୋମାକୁ ନିଷ୍କ୍ରିୟ କରିବାରେ ସୁଶାନ୍ତ ବେଶ ଧୁରନ୍ଦର ଥିଲେ ।