ଦିଲ୍ଲୀ ଅବକାରୀ ଘୋଟାଲା ମାମଲା: ସଞ୍ଜୟ ସିଂଙ୍କୁ ବିରୋଧରେ ଚାର୍ଜସିଟ ଦାଖଲ କଲା ଇଡି

ଦିଲ୍ଲୀ ଅବକାରୀ ଘୋଟାଲା ମାମଲାରେ ସଞ୍ଜୟ ସିଂଙ୍କ ବିରୋଧରେ ଚାର୍ଜସିଟ ଦାଖଲ କଲା ଇଡି । ଅକ୍ଟୋବର 4 ତାରିଖରେ ହୋଇଥିଲେ ଗିରଫ । ସମାନ ମାମଲାରେ ଏପର୍ଯ୍ୟନ୍ତ ବେଲ ପାଇନାହାନ୍ତି ସିସୋଦିଆ । ଅଧିକ ପଢନ୍ତୁ

ନୂଆଦିଲ୍ଲୀ: ବହୁଚର୍ଚ୍ଚିତ ଦିଲ୍ଲୀ ଅବକାରୀ ନୀତି ଘୋଟାଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଦ୍ବାରା ଗିରଫ ହୋଇଥିବା ଆମ ଆଦମୀ ପାର୍ଟିର ଅନ୍ୟତମ ବରିଷ୍ଠ ନେତା ତଥା ରାଜ୍ୟସଭା ସାଂସଦ ସଞ୍ଜୟ ସିଂଙ୍କ ବିରୋଧରେ ଆଜି ଚାର୍ଜସିଟ ଦାଖଲ କରିଛି ତଦନ୍ତକାରୀ ସଂସ୍ଥା । ଆଜି କେନ୍ଦ୍ରୀୟ ସଂସ୍ଥା ଦିଲ୍ଲୀର ଏକ ସ୍ଥାନୀୟ କୋର୍ଟରେ 60 ପୃଷ୍ଠା ବିଶିଷ୍ଟ ମଧ୍ୟବର୍ତ୍ତୀକାଳୀନ ଚାର୍ଜସିଟ ଦାଖଲ କରିଛି । ପୂର୍ବରୁ ଏହି ମାମଲାରେ ଦଳର ଅନ୍ୟତମ ବରିଷ୍ଠ ନେତା ତଥା ଦିଲ୍ଲୀ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ମଧ୍ୟ ଗିରଫ ହୋଇ ଜେଲରେ ରହିଛନ୍ତି । ତାଙ୍କୁ ଏପର୍ଯ୍ୟନ୍ତ ବେଲ ମିଳିପାରିନି । ଏବେ ସଞ୍ଜୟଙ୍କ ବିରୋଧରେ ଆଜି ମଧ୍ୟବର୍ତ୍ତୀକାଳୀନ ଚାର୍ଜସିଟ ଦାଖଲ କରାଯାଇଛି ।

ଦିଲ୍ଲୀ ଅବକାରୀ ଘୋଟଲା ମାମଲାରେ ଅକ୍ଟୋବର 4 ତାରିଖରେ ସଞ୍ଜୟଙ୍କ ଘରେ ପ୍ରବର୍ତ୍ତନନ ନିର୍ଦ୍ଦେଶାଳୟ ଚଢାଉ କରିଥିଲା । ନଗଦ ଟଙ୍କା ଓ ବହୁ କାଗଜପତ୍ର ମଧ୍ୟ ଜବତ କରିଥିବା ଇଡି କହିଥିଲା । ଏକାଧିକ ଘଣ୍ଟା ଜେରା କରିବା ପରେ ଅପରାହ୍ନରେ ସଞ୍ଜୟଙ୍କୁ ଗିରଫ କରିଥିଲା ଇଡି । ସଂଞ୍ଜୟ ଏହି ମାମଲାରେ ସମ୍ପୃକ୍ତ ଓ ୮୨ ଲକ୍ଷର ଚାନ୍ଦା ସଂଗ୍ରହ କରିଥିବା ତଦନ୍ତକାରୀ ସଂସ୍ଥା ଦର୍ଶାଇଥିଲା ।

କଣ ଏହି ବହୁଚର୍ଚ୍ଚିତ ଘୋଟାଲା:-

ଦିଲ୍ଲୀର ପୁରୁଣା ଅବକାରୀ ନୀତି ଅନୁଯାୟୀ ଖୁଚୁରା ବିକ୍ରେତାମାନଙ୍କୁ L1ଓ L10 ଅନୁସାରେ ଲାଇସେନ୍ସ ଦିଆଯାଇଥିଲା । 2021 ନଭେମ୍ବର 17 ତାରିଖରେ ଦିଲ୍ଲୀ ସରକାର ନୂତନ ଅବକାରୀ ନୀତି (ଏକ୍ସାଇଜ୍ ପଲିସି) ଲାଗୁ କରିବା ପାଇଁ ନିଷ୍ପତ୍ତି ନେଇଥିଲେ । ସେପର୍ଯ୍ୟନ୍ତ ରାଜଧାନୀରେ ମୋଟ 849 ଟି ମଦ ଦୋକାନ ଥିଲା । ସେଥିମଧ୍ୟରୁ 60% ଦୋକାନ ସରକାରୀ ଏବଂ 40% ଘରୋଇ ମଦ ଦୋକାନ ରହିଥିଲା । ନୂତନ ଅବକାରୀ ନୀତି କାର୍ଯ୍ୟକାରୀ କରାଯିବା ପରେ ଦିଲ୍ଲୀକୁ ମୋଟ 32 ଟି ଜୋନରେ ବିଭକ୍ତ କରାଯାଇଥିଲା ।

ପ୍ରତ୍ୟେକ ଜୋନରେ 27ଟି ମଦ ଦୋକାନ ଖୋଲିବା ନେଇ ଅନୁମତି ମିଳିଥିଲା ।ଏହା ଫଳରେ ଘରୋଇ ମଦ ବ୍ୟବସାୟୀଙ୍କୁ ଅଧିକ ଲାଭ ମିଳିଥିଲା ଓ ଆମ ଆଦମୀ ପାର୍ଟି ଏମାନଙ୍କଠାରୁ ଚାନ୍ଦା ସଂଗ୍ରହ କରିଥିବା ଅଭିଯୋଗ ହୋଇଥିଲା । ସେହିପରି ଏହି ନିୟମରେ ପରିବର୍ତ୍ତନ କରିବା ପୂର୍ବରୁ ଉପରାଜ୍ୟପାଳଙ୍କ ଅନୁମତି ମଧ୍ୟ ନିଆଯାଇ ନଥିବା ଅଭିଯୋଗ ହୋଇଥିଲା । ପରେ ଏହି ମାମଲାରେ କେନ୍ଦ୍ରୀୟ ସଂସ୍ଥା ଦ୍ବାରା ତଦନ୍ତ ଆରମ୍ଭ ହୋଇଥିଲା ।

ବ୍ୟୁରୋ ରିପୋର୍ଟ, ଇଟିଭି ଭାରତ