ହାଇଦ୍ରାବାଦ:ବିହାରରେ ଦିଲ୍ଲୀ କାର ଟ୍ରାଜେଡି ମାମଲାର ପୁନରାବୃତ୍ତି । ଦୁର୍ଘଟଣା ପରେ ବୃଦ୍ଧଙ୍କୁ 8 କି.ମି ପର୍ଯ୍ୟନ୍ତ ଘୋଷାଡି ନେଇ କାର ମଡାଇ ଡ୍ରାଇଭର ହତ୍ୟା କରିଥିବା ଅଭିଯୋଗ ହୋଇଛି । ଜଣେ ବିହାରର ପୂର୍ବଚମ୍ପାରନ ଜିଲ୍ଲାର କୋଟୱା ପୋଲିସ ଷ୍ଟେସନ ଅଞ୍ଚଳରେ ଏପରି ଏକ ଅଘଟଣ ପୁଣି ଥରେ ଅଞ୍ଜଳି କାଣ୍ଡର ଭୟାବହତାକୁ ମନେ ପକାଇଛି । ପ୍ରାଣ ହରାଇଥିବା ବୃଦ୍ଧ 70 ବର୍ଷୀୟ ଶଙ୍କର ଓ ସେ ସ୍ଥାନୀୟ କୋଟୱା ପୋଲିସ ଷ୍ଟେସନର ବଙ୍ଗରା ଗାଁର ବାସିନ୍ଦା ବୋଲି ପୋଲିସ ଚିହ୍ନଟ କରିଛି ।
ସୂଚନା ଅନୁଯାୟୀ ଶଙ୍କର ଏକ ସାଇକେଲ ଯୋଗେ NH-27 ପାର ହେଉଥିଲେ । ଗୋପାଳଗଞ୍ଜରୁ ଏକ ଦ୍ରୁତ ଗତିରେ ଆସୁଥିବା କାର ତାଙ୍କୁ ଧକ୍କା ଦେଇଥିଲା । ଧକ୍କା ହେବା ପରେ ଶଙ୍କର ସିଧାସଳଖ କାରର ସମ୍ମୁଖ ଭାଗ (ବନେଟ) ଉପରେ ପଡିଯାଇଥିଲେ । କାରଟିର ଡ୍ରାଇଭର ଏହା ଦେଖି ସୁଦ୍ଧା ବୃଦ୍ଧଜଣଙ୍କୁ ପ୍ରାୟ 8 କି.ମି ପର୍ଯ୍ୟନ୍ତ ଘୋଷାଡି ନେଇଥିଲେ । ତେବେ ଏକ ନିଛାଟିଆ ସ୍ଥାନରେ ବୃଦ୍ଧଙ୍କ ଉପରେ କାର ମଡାଇ ଦେଇ ଡ୍ରାଇଭର କାର ନେଇ ଫେରାର ହୋଇଯାଇଥିବା ପ୍ରତ୍ୟେକ୍ଷଦର୍ଶୀ କହିଛନ୍ତି । ଦୁର୍ଘଟଣା ସ୍ଥଳରୁ ପ୍ରାୟ 8 କି.ମି ଦୂରରେ ବୃଦ୍ଧଙ୍କ କ୍ଷତାକ୍ତ ମୃତଦେହ ଉଦ୍ଧାର ହେବା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି ।