ଲକ୍ଷ୍ନୌ:ମୃତ୍ୟୁ ପରେ ମୃତଦେହକୁ ସମ୍ମାନ ନମିଳିବା ଘଟଣା ଅନେକ ସମୟରେ ଆମ ସାମଜିକ ବ୍ୟବସ୍ଥା ଓ ସମ୍ବେଦନଶୀଳତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି । କିନ୍ତୁ ଏକ ମଇଁଷିର ମୃତ୍ୟୁ ପରେ ତାକୁ ଶୋଭାଯାତ୍ରାରେ ଶେଷକୃତ୍ୟ ପାଇଁ ନିଆଯାଇଛି । ଏକ ଜେସିବିରେ ମଇଁଷିର ମୃତଦେହ ରଖାଯାଇ ବ୍ୟାଣ୍ଡବାଜା ସହିତ ଶୋଭାଯାତ୍ରାରେ ମଇଁଷିର ମୃତଦେହକୁ ସତ୍କାର ସ୍ଥାନକୁ ନିଆଯାଇଛି । ଏଥିରେ ସ୍ଥାନୀୟ ଅଞ୍ଚଳର ଶତାଧିକ ଲୋକେ ସାମିଲ ହୋଇଥିଲେ । କେବଳ ଏତିକି ନୁହେଁ ଏହି ଶୋଭାଯାତ୍ରାରେ ସାମିଲ ଥିବା କିଛି ଲୋକ ମଇଁଷି ମୃତ୍ୟୁରେ ଭାଙ୍ଗିପଡି କାନ୍ଦୁଥିବାର ମଧ୍ୟ ଦେଖିବାକୁ ମିଳିଥିଲା । ଏପରି ଏକ ଘଟଣା ଉତ୍ତର ପ୍ରଦେଶ ଝାନ୍ସି ଜିଲ୍ଲାରେ ଦେଖିବାକୁ ମିଳିଛି । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି ।
ସୂଚନା ଅନୁସାରେ, ଘଟଣାଟି ଝାନ୍ସି ଜିଲ୍ଲା ସମଥର ଥାନା ଏରିଆରେ ଘଟିଛି । ସ୍ଥାନୀୟ ଛୋଟା ବେଲମା ଗ୍ରାମରେ କାରସ ଦେବ ମହାରାଜ (ଭୋଳା) ନାମରେ ଏକ ମଇଁଷି ରହୁଥିଲା । ଏହା କୌଣସି ନିର୍ଦ୍ଦିଷ୍ଟ ବ୍ୟକ୍ତିବିଶେଷଙ୍କ ମଇଁଷି ନଥିଲା । ପୁରା ଗ୍ରାମର ଲୋକେ ମଇଁଷିକୁ ଶ୍ରଦ୍ଧା କରିବା ସହ ତାର ଯତ୍ନ ନେଉଥିଲେ । ଗତକାଲି (ବୁଧବାର) ଅଚାନକ ମଇଁଷି ଭୋଳାର ମୃତ୍ୟୁ ହୋଇଯାଇଥିଲା । ଏହି ସୂଚନା ପାଇବା ମାତ୍ରେ ଶତାଧିକ ଲୋକେ ଗ୍ରାମରେ ପହଞ୍ଚି ମଇଁଷିର ଶେଷ ଦର୍ଶନ କରିଥିଲେ । ଶେଷରେ ସମ୍ପୂର୍ଣ୍ଣ ହିନ୍ଦୁ ରୀତିନୀତିରେ ଶେଷକୃତ୍ୟ ସମ୍ପନ୍ନ କରାଯିବା ନେଇ ଗ୍ରାମବାସୀ ନିଷ୍ପତ୍ତି ନେଇଥିଲେ ।