ହାଇଦ୍ରାବାଦ: କୋରୋନା ମହାମାରୀ ଆପଣାକୁ କରିଛି ପର, ପରକୁ କରିଛି ଆପଣା । ସଂକ୍ରମଣ ଦୃଷ୍ଟିରୁ ନିଜ ଆତ୍ମୀୟ ପରିଜନଙ୍କ ପାଖ ମାଡୁନାହାନ୍ତି ସମ୍ପର୍କୀୟ । ଏହାରି ମଧ୍ୟରେ ତେଲେଙ୍ଗାନା ଛାତ୍ରଙ୍କ ଏକ ଦୁଃସାହସିକ କାର୍ଯ୍ୟ ସାମନାକୁ ଆସିଛି । ନିଜ ଜୀବନ ପ୍ରତି ଭୟ ନ କରି ହାଇଦ୍ରାବାଦର ଜଣେ ଶେଷ ବର୍ଷର ବି.ଟେକ ଛାତ୍ର ଜିଶାନ ଅଲି ଖାନ କୋଭିଡ ଆକ୍ରାନ୍ତଙ୍କ ଅନ୍ତିମ ସଂସ୍କାର କାର୍ଯ୍ୟ କରୁଥିବା ସୂଚନା ମିଳିଛି ।
କୋରୋନା ମହାମାରୀର ଦ୍ବିତୀୟ ଲହରୀ ଅତି ଭୟଙ୍କର ରୂପ ନେଇ ଆସିଛି । ଦ୍ବିତୀୟ ଲହରରେ ଅଧିକ ସଂକ୍ରମଣ ବ୍ୟାପିଥିବା ବେଳେ ହଜାର ହଜାର ଲୋକଙ୍କ ପ୍ରତିଦିନ ପ୍ରାଣହାନୀ ଘଟିଛି । ପାଠପଢା ସହିତ ମଧ୍ୟ ଜିଶାନ NGO ୟୁଥ ୱେଲଫେୟାର ସଙ୍ଗଠନରେ ସାମାଜିକ ଧର୍ମୀ କାର୍ଯ୍ୟ କରୁଛନ୍ତି । ସଙ୍ଗଠନର ଅନ୍ୟ ସଦସ୍ୟଙ୍କ ସହ ମିଶି ସେ ପ୍ରାୟ 1800ଟି କୋଭିଡ ଆକ୍ରାନ୍ତଙ୍କ ଅନ୍ତିମ ସଂସ୍କାର କରିଥିବା କହିଛନ୍ତି । କୋରୋନା ମହାମାରୀ ସଂକ୍ରମଣ ଯୋଗୁଁ ସମ୍ପର୍କୀୟମାନେ ମୃତଦେହକୁ ସ୍ପର୍ଶ କରୁନଥିବାକୁ ସେ ସହଜରେ ଗ୍ରହଣ କରିପାରିନଥିଲେ । ଏଣୁ ସେ କୋଭିଡ ଆକ୍ରାନ୍ତଙ୍କ ମୃତଦେହର ଅନ୍ତିମ ସଂସ୍କାର କରିବାକୁ ସ୍ଥିର କରିଥିଲେ ।