ଭାଇରାଲ ବୟ ଡେରେକଙ୍କୁ ମିଳିଲା ସମ୍ମାନ

ମିଜୋରାମର 6 ବର୍ଷର ବାଳକ ଡେରେକର ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା । କୁକୁଡା ଛୁଆ ପ୍ରତି ତାଙ୍କର ଦୟାଭାବକୁ ସଲାମ କରିଛନ୍ତି ଲୋକେ । ତାଙ୍କର ସରଳତା ଏବଂ ଦୟାଳୁ ଭାବ ଯୋଗୁଁ ତାଙ୍କ ବିଦ୍ୟାଳୟ ପକ୍ଷରୁ ତାଙ୍କୁ ସମ୍ମାନିତ କରାଯାଇଛି।

ନୂଆଦିଲ୍ଲୀ: ବ୍ୟସ୍ତବହୁଳ ଜୀବନ ଭିତରେ ଅନ୍ୟକୁ ସାହାଯ୍ୟ କରିବା ତ ଦୂରର କଥା ଅନ୍ୟ ବିଷୟରେ ଚିନ୍ତା କରିବା ବି ମୁସ୍କିଲ। ତେବେ ଏଭଳି ସମୟରେ ମିଜୋରାମର 6 ବର୍ଷର ବାଳକର ଦୟାଭାବର ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା । ଆଉ ବର୍ତ୍ତମାନ ତାଙ୍କର ଏହି ଦୟାଭାବ ଯୋଗୁଁ ତାଙ୍କ ବିଦ୍ୟାଳୟରେ ସମ୍ମାନିତ କରାଯାଇଛି।

ତେବେ ଘଟଣାଟି ଥିଲା ଏପରି, ମିଜୋରାମ ସାଇରଙ୍ଗର 6 ବର୍ଷୀୟ ବାଳକ ଡେରେକ ସି ଲାଲକ୍ଷ୍ମୀମା । ଘର ବାହାରେ ଖେଳୁଥିବା ବେଳେ ଭୁଲବଶତଃ ତାଙ୍କ ସାଇକେଲଟି ପଡୋଶୀଙ୍କ କୁକୁଡା ଛୁଆ ଉପରେ ଚଢିଯାଇଥିଲା । ଫଳରେ କୁକୁଡା ଛୁଆଟି ଆହତ ହୋଇଥିଲା। କିନ୍ତୁ ଡେରେକ କୁକୁଡା ଛୁଆର ଏଭଳି କଷ୍ଟ ଦେଖିପାରିନଥିଲେ। ସଙ୍ଗେ ସଙ୍ଗେ ଘରକୁ ଯାଇ କୁକୁଡା ଛୁଆର ଚିକିତ୍ସା ପାଇଁ ଟଙ୍କା ମାଗିଥିଲେ। କିନ୍ତୁ କୁକୁଡା ଛୁଆଟି ମରିଯାଇଥିବା ଡେରେକଙ୍କ ବାପା କହିଥିଲେ । ହେଲେ ବୁଝି ନଥିଲା ତାଙ୍କ ମନ । ପାଖରେ ଯେତିକି ଟଙ୍କା ଥିଲା ସେତିକି ନେଇ ସ୍ଥାନୀୟ ହସ୍ପିଟାଲକୁ ଧାଇଁଥିଲେ ସେ । ଏତିକି ଟଙ୍କା ନେଇ କୁକୁଡା ଛୁଆକୁ ବଞ୍ଚାଇବା ପାଇଁ ଡାକ୍ତରଙ୍କୁ ଅନୁରୋଧ କରିଥିଲେ।

ଡେରେକଙ୍କ ସରଳତା ଏବଂ ନିଃସ୍ବାର୍ଥପରତା ଦେଖି ତାଙ୍କର କିଛି ଫଟୋ ଉଠାଇଥିଲେ ହସ୍ପିଟାଲର ଜଣେ ନର୍ସ । ଆଉ ତା ପରେ ଭାଇରାଲ ହେବାରେ ଲାଗିଥିଲା ତାଙ୍କର ଏହି ଫଟୋ । ତେବେ ପିଲାଟିର ଏଭଳି ଦୟାଳୁ ଭାବ ନେଇ ସ୍ଥାନୀୟ ଅଞ୍ଚଳ ସମେତ ସାରା ଦେଶରେ ଚର୍ଚ୍ଚା ହେଉଛି। ବର୍ତ୍ତମାନ ଡେରେକଙ୍କ ଭିଡିଓ 87,000 ଥର ସୋସିଆଲ ମିଡିଆରେ ସେୟାର ହୋଇସାରିଲାଣି।