ନୂଆଦିଲ୍ଲୀ: ଆମେରିକାର ସୋସିଆଲ ମିଡିଆର ନାମିଦାମୀ କମ୍ପାନୀ 'ଟ୍ବିଟର' ନିଷିଦ୍ଧ ଆତଙ୍କବାଦୀ ସଂଗଠନରୁ ଟଙ୍କା ନେଉଛି । ରବିବାର ଏଭଳି ଅଭିଯୋଗ ଆଣିଛନ୍ତି ବିଜେପି ନେତା ବିନୀତ ଗୋଏଙ୍କା । ଆଉ ଏମାନେ ସେହି ଆତଙ୍କବାଦୀ ଯେଉଁମାନେ ଭାରତୀୟ ନାଗରିକଙ୍କୁ ଟାର୍ଗେଟ କରିବାରେ ସାମିଲ ଅଛନ୍ତି ।
ବିଜେପିର ସୂଚନା ଏବଂ ପ୍ରଯୁକ୍ତିବିଦ୍ୟା (ଆଇଟି) ସେଲର ଜାତୀୟ ସହ-ସଂଯୋଜକ ବିନୀତ ଗୋଏଙ୍କା ଏକ ଅନଲାଇନ୍ ପ୍ୟାନେଲ୍ ଆଲୋଚନା ସମୟରେ ଟ୍ୱିଟରରେ ଉପରେ ଏହି ଅଭିଯୋଗ ଆଣିଥିଲେ । ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ବିନୀତ ଗୋଏଙ୍କା ଆହୁରି କହିଛନ୍ତି ଯେ ଟ୍ବିଟ ଦେଶର ନାଗରିକଙ୍କ ବିରୋଧରେ ଅପରାଧ ବୃଦ୍ଧି କରିବାକୁ ଆତଙ୍କବାଦୀ ସଂଗଠନ ଠାରୁ ଗୁପ୍ତ ଭାବରେ ଟଙ୍କା ନେଇଥାଏ । ସେ ପଚାରିଛନ୍ତି ଯେ ଆମେ ବିଚ୍ଛିନ୍ନତାର କାରଣକୁ ବଢାଇବା ପାଇଁ ବ୍ଲଡ ମନି ନେଇଥିବା ବ୍ୟକ୍ତିଙ୍କୁ ସହ୍ୟ କରିବୁ କି? ଆଉ ତାଙ୍କର ଏହି ଅଭିଯୋଗ ପରେ ମାମଲାକୁ ନେଇ ଆଲୋଡ଼ନ ସୃଷ୍ଟି ହୋଇଛି ।
ଗୋଏଙ୍କା କହିଛନ୍ତି ଯେ, ସେ ଟ୍ବିଟରରେ ଟ୍ରେଣ୍ଡିଂ କରୁଥିବା 'ହ୍ୟାସଟ୍ୟାଗ ଖାଲିସ୍ତାନ 2020' ର ପ୍ରଚାରକୁ ଯାଞ୍ଚ କରିବା ସମୟରେ ତାଙ୍କୁ ଅନେକ ପ୍ରମାଣ ମିଳିଛି । ଏହି ଟ୍ରେଣ୍ଡକୁ ଆମେରିକା ଭିତ୍ତିକ ଗୋଷ୍ଠୀ ଶିଖ୍ ଫର ଜଷ୍ଟିସ୍ (SFJ) ସମର୍ଥନ କରୁଛି । ଏହି ସଂଗଠନ ଶିଖମାନଙ୍କ ପାଇଁ ଏକ ପୃଥକ ଦେଶ ଦାବି କରେ । ଗୋଏଙ୍କା ନିଜ ମନ୍ତବ୍ୟରେ ସୋସିଆଲ ମିଡିଆର ଦିଗଜ କମ୍ପାନୀର ଆଚରଣକୁ ନିୟନ୍ତ୍ରଣ କରିବା ପାଇଁ କଠୋର ପଦକ୍ଷେପ ଗ୍ରହଣ କରିବାକୁ କହିଥିଲେ ।
ସେ ଟ୍ବିଟରରେ ସ୍ୱଚ୍ଛତାର ଅଭାବ ଏବଂ ଭାରତୀୟ ବ୍ୟବହାରକାରୀଙ୍କ ଚିନ୍ତାଧାରା ପ୍ରତି ଉଦାସୀନତାର ଅଭିଯୋଗ ଆଣିଛନ୍ତି । ସେ ସରକାରଙ୍କୁ ଟ୍ୱିଟର ଇଣ୍ଡିଆ କର୍ମଚାରୀଙ୍କ ବିରୋଧରେ ଦେଶଦ୍ରୋହ ଅଭିଯୋଗ ଲାଗୁ କରିବାକୁ ଦାବି କରିଛନ୍ତି । ଏହିପରି କର୍ମଚାରୀମାନେ 'ଜାତୀୟ ବିରୋଧୀ' ସାମଗ୍ରୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ବିଫଳ ହୋଇଛନ୍ତି । ଏହା ସହ ସେ ଟ୍ବିଟରରେ ଏକ ସକ୍ରିୟ ଆକାଉଣ୍ଟ ଏବଂ କେୱାଇସି ମାନଦଣ୍ଡ ସହିତ ଟ୍ବିଟର ବ୍ୟବହାରକାରୀଙ୍କ ପାଇଁ କଡା ଯାଞ୍ଚ ପ୍ରକ୍ରିୟା ମଧ୍ୟ କରିବାକୁ ଦାବି କରିଛନ୍ତି ।
