ଲକ୍ଷ୍ନୌ: ଚର୍ଚ୍ଚାରେ ଗ୍ୟାଙ୍ଗଷ୍ଟାର ବିକାଶ ଦୁବେର ଏନକାଉଣ୍ଟର ଘଟଣା । ସନ୍ଦେହରେ ଏସଟିଏଫର ଏନକାଉଣ୍ଟର କାହାଣୀ । ଏନକାଉଣ୍ଟରର ପାରିପାର୍ଶ୍ବିକ ଅବସ୍ଥା ଓ ପୋଲିସର ବୟାନରେ ତାଳମେଳ ରହୁନଥିବାରୁ ଉଠୁଛି ପ୍ରଶ୍ନ ।
ସାମ୍ନାକୁ ଆସୁଥିବା ଭିଡିଓରେ ବିକାଶ ଦୁବେ ଗୋଟିଏ ଗାଡିରେ ବସିଥିବାବେଳେ ଦୁର୍ଘଟଣାଗ୍ରସ୍ତ ହୋଇଥିବା ଗାଡିଟି ବିକାଶ ଦୁବେ ବସିଥିବା ଗାଡି କୁହାଯାଉଥିବାରୁ ଏହାକୁ ନେଇ ଉଙ୍କିମାରୁଛି ଅନେକ ପ୍ରଶ୍ନ । ସେପଟେ ଘଟଣାକୁ ନେଇ ଜାତୀୟ ମାନବାଧିକାର ଆୟୋଗର ଦ୍ବାରସ୍ଥ ହୋଇଛନ୍ତି ରାଜନୈତିକ ଟିପ୍ପଣୀକାର ତହସିନ ପୁନାଓ୍ଵାଲା ।
ତେବେ ଘଟଣାକୁ ନେଇ କାହିଁକି ହେଉଛି ସନ୍ଦେହ ? କଣ ରହିଛି ପୁରା ଘଟଣାବଳୀ ? ଆସନ୍ତୁ ଜାଣିବା...
ଏନକାଉଣ୍ଟରକୁ ନେଇ କଣ କହୁଛି ପୋଲିସ...
ପୋଲିସ କହିବା ଅନୁସାରେ, ଗ୍ୟାଙ୍ଗଷ୍ଟାର ବିକାଶ ଦୁବେକୁ ଗୁରୁବାର ରାତିରେ ମଧ୍ୟପ୍ରଦେଶର ଉଜ୍ଜୈନ ପୋଲିସ ଠାରୁ ୟୁପି ପୋଲିସ କାନପୁର ଆଣୁଥିଲା । ତେବେ ଲକ୍ଷ୍ୟସ୍ଥଳର କିଛି ବାଟ ପୂର୍ବରୁ ଶୁକ୍ରବାର ସକାଳେ ବିକାଶକୁ ଆଣି ଆସୁଥିବା ଗାଡିଟି ଭାରସ୍ୟାମ ହରାଇ ଓଲଟି ପଡିଥିଲା ।
ଯେଉଁଥିରେ 4 ଜଣ ପୋଲିସ ଆହତ ହୋଇଥିଲେ । ସେହି ଆହତ ପୋଲିସ ଅଧିକାରୀଙ୍କ ଠାରୁ ବିକାଶ ବନ୍ଧୁକ ଛଡାଇ ପଳାଇବାକୁ ଚେଷ୍ଟା କରୁଥିବା ସମୟରେ ପୋଲିସ ତାକୁ ଅଟକାଇବା ପାଇଁ ଚେଷ୍ଟା କରିଥିଲା । ହେଲେ ବିକାଶ ନମାନିବାରୁ ପୋଲିସ ଏନକାଉଣ୍ଟର କରିଥିଲା । ପରେ ବିକାଶକୁ ହସ୍ପିଟାଲକୁ ନିଆଯାଇଥିଲା । ଯେଉଁଠାରେ ଚିକିତ୍ସାଧିନ ଅବସ୍ଥାରେ ତାର ମୃତ୍ୟୁ ଘଟିଛି ।
କଣ ରହିଛି ପାରିପାର୍ଶ୍ବିକ ଅବସ୍ଥା...
ବିକାଶ ଦୁବେକୁ ନେଇ ଏକ ଭିଡିଓ ସାମ୍ନାକୁ ଆସିଛି । ଭିଡିଓଟି ଭୋର ଚାରିଟାର ହୋଇଥିବାବେଳେ ଏହା ବିକାଶ ଦୁବେକୁ ଆଣି ଆସୁଥିବା ତିନୋଟି ଗାଡି ଏକ ଟୋଲ ଗେଟ୍ କ୍ରସ କରୁଛନ୍ତି । ତେବେ ଏଠାରେ ଦୁର୍ଘଟଣାଗ୍ରସ୍ତ ହୋଇଥିବା ଗାଡି ବଦଳରେ ବିକାଶ ଅନ୍ୟ ଏକ ଗାଡିରେ ବସିଥିବାର ଦେଖିବାକୁ ମିଳୁଛି ।
ସେହିପରି ଅନ୍ୟ ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ବିକାଶ ଦୁବେକୁ ପିଛା କରୁଥିବା ଗଣମାଧ୍ୟମ ପ୍ରତିନିଧିକୁ 6.30ରେ ଏକ ତନଖି ନିକଟରେ ଅଟକାଯାଇଛି । ଯାହାକି ଏନକାଉଣ୍ଟରର ଅଧଘଣ୍ଟା ପୂର୍ବରୁ କରାଯାଇଛି । ଏନେଇ ଗଣମାଧ୍ୟମ ପ୍ରତିନିଧି ପୋଲିସକୁ ପଚାରିବାରୁ ସେ ଯାଞ୍ଚ ଚାଲୁଥିବା କହିଛନ୍ତି । ହେଲେ କଣ ପାଇଁ ତାହାର କୌଣସି ସନ୍ତୋଷଜନକ ଉତ୍ତର ଦେଇପାରିନାହାଁନ୍ତି ।
ସେପଟେ ପ୍ରତ୍ୟକ୍ଷଦର୍ଶୀ ଆଶିଷ ପାଶୱାନଙ୍କ କହିବାଅନୁସାରେ, ‘ଆମେ ଗୁଳିଫୁଟିବାର ଶବ୍ଦ ଶୁଣିଛୁ । ଆଉ ଆମେ ସେଠାକୁ ଯିବା ସମୟରେ ଆମକୁ ପୋଲିସ ଏଠାରୁ ଚାଲିଯିବାକୁ କହିଥିଲା । ତେବେ ସେପର୍ଯ୍ୟନ୍ତ କୌଣସି ଦୁର୍ଘଟଣା ହୋଇଥିବା ଆମେ ଦେଖିନାହୁଁ ।’
ଅନ୍ୟପଟେ ଆଉ ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ ପୋଲିସ ବିକାଶ ଦୁବେକୁ ମେଡିକାଲ ନେଇଯାଉଛି । ତେବେ ବର୍ଷା ହେଉଥିବା ତଥା ମାଟିରେ ଗାଡି ଭାରସ୍ୟାମ ହରାଇ ଗାଡିଟି ଓଲଟି ପଡିଥିବା ପୋଲିସ କହୁଥିବାବେଳେ ବିକାଶର ଡ୍ରେସରେ କୌଣସି କାଦୁଅର ଦାଗ ମେଡିକାଲ ନେବା ସମୟରେ ଦେଖିବାକୁ ମିଳିନାହିଁ । ଯାହାକି ସନ୍ଦେହ ସୃଷ୍ଟି କରୁଛି ।
ସୂଚନାଥାଉକି, ଗତ ଗୁରୁବାର ଦିନ କାନପୁରର ବିକ୍ରୁ ଗାଁରେ ବିକାଶ 8 ଜଣ ପୋଲିସଙ୍କୁ ଗୁଳି କରି ହତ୍ୟା କରିଥିଲା । ଯେଉଁଥିଲାଗି ପୋଲିସ ତାକୁ ଖୋଜୁଥିବାବେଳେ ତାକୁ ଧରାଇଦେଲେ 5 ଲକ୍ଷ ଟଙ୍କା ମିଳିବ ବୋଲି ଘୋଷଣା କରାଯାଇଥିଲା । ଉତ୍ତରପ୍ରଦେଶର ବିଭିନ୍ନ ରାସ୍ତାକୁ ସିଲ୍ କରାଯିବା ସହ ଚାରିଆଡେ ବିକାଶର ଫଟୋ ଲଗାଯାଇଥିଲା । ହେଲେ ଏସବୁ ଭିତରେ ସେ ପୋଲିସକୁ ଚକମା ଦେଖାଇ ମଧ୍ୟପ୍ରଦେଶ ପହଞ୍ଚି ଯାଇଥିବା ସହ ସେଠାରୁ ତାକୁ ଗିରଫ କରାଯାଇଥିଲା ।
@IANS
