ନୂଆଦିଲ୍ଲୀ: ଉତ୍ତର-ପୂର୍ବ ବିଜେପି ଶାସିତ ତ୍ରିପୁରାର ମୁଖ୍ୟମନ୍ତ୍ରୀ ବିପ୍ଲବ ଦେବଙ୍କ ବିରୋଧରେ ଅସନ୍ତୋଷ ସାମ୍ନାକୁ ଆସିଛି। ତ୍ରିପୁରାର କିଛି ବିଜେପି ବିଧାୟକ ବର୍ତ୍ତମାନ ରାଜଧାନୀ ଦିଲ୍ଲୀରେ କ୍ୟାମ୍ପ କରି ନିଜ ପାଇଁ ନ୍ୟାୟ ଦାବି କରୁଛନ୍ତି। ଅଗରତାଲା ଠାରୁ 2500 କିଲୋମିଟର ଯାତ୍ରା କରିବା ପରେ ଦିଲ୍ଲୀରେ ପହଞ୍ଚିଥିବା ଏହି ବିଧାୟକମାନେ ପାର୍ଟି ହାଇ କମାଣ୍ଡଙ୍କୁ ଭେଟିବାକୁ ଚାହୁଁଛନ୍ତି ଏବଂ ମୁଖ୍ୟମନ୍ତ୍ରୀଙ୍କ ବିରୋଧରେ ଅଭିଯୋଗ କରିବାକୁ ଚାହୁଁଛନ୍ତି।
ରିପୋର୍ଟ ଅନୁଯାୟୀ, ବର୍ତ୍ତମାନ 11 ଜଣ ବିଧାୟକ ଦିଲ୍ଲୀରେ କ୍ୟାମ୍ପ କରୁଛନ୍ତି। ଏହି ବିଧାୟକମାନେ ବିପ୍ଲବ କ୍ୟାବିନେଟର କିଛି ମନ୍ତ୍ରୀଙ୍କ ସମର୍ଥନ ମଧ୍ୟ ପାଇଛନ୍ତି। ଶନିବାର ତ୍ରିପୁରାର ସୂର୍ଯ୍ୟମଣିନଗରର ବିଧାୟକ ରାମ ପ୍ରସାଦ ପାଲ ବିଜେପି ରାଷ୍ଟ୍ରୀୟ ମହାସଚିବ ବି.ଏଲ୍ ସନ୍ତୋଷଙ୍କୁ ଭେଟି ବିଧାୟକଙ୍କ ଚିନ୍ତା ଏବଂ ମୁଖ୍ୟମନ୍ତ୍ରୀଙ୍କ ମନମାନି ବିଷୟରେ କହିଥିଲେ । ସୂଚନାନୁସାରେ, ବିଧାୟକମାନେ ସ୍ପଷ୍ଟ ଭାବେ କହିଛନ୍ତି ଯେ ବିଜେପିରେ ସେମାନଙ୍କର କୌଣସି ଅସୁବିଧା ନାହିଁ ଏବଂ ସେମାନେ ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ବରେ କାର୍ଯ୍ୟ କରିବେ ।