ଚମକାଉଛି ଚମକି

ଚମକି ଜ୍ବରକୁ ନେଇ ରାଜନୈତିକ ମହଲରେ ଆରୋପ ପ୍ରତ୍ୟାରୋପ ପର୍ବ ଚାଲିଥିବାବେଳେ କେବେ ସ୍ଥିତି ସ୍ବାଭାବିକ ହେବ ତାହା ଉପରେ ରାଜ୍ୟବାସୀଙ୍କ ନଜର ।

ପାଟନା: ଚାରିଆଡୁ ଶୁଭୁଛି କାନ୍ଦ ବୋବାଳି ରଡି । ଅକାରଣରେ ଚାଲିଯାଉଛି ନିଷ୍ପାପ ଶିଶୁଙ୍କ ଜୀବନ । ଆମେ କହୁଛୁ ବିହାର ମୁଜାଫରପୁର ର କଥା । ଯେଉଁଠି ଏନସେଫାଲାଇଟ୍ସ ବା ଚମକି ଜ୍ବରରେ ପ୍ରାଣ ହରାଇଲେଣି 173 ଶିଶୁ । ଏବେବି ଶହଶହ ଶିଶୁ ରାଜ୍ୟର ବିଭିନ୍ନ ସରକାରୀ ଓ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି । ସ୍ଥିତି ପରଖିବା ପାଇଁ ମେଡିକାଲରେ ନେତା, ମନ୍ତ୍ରୀ ଓ ସେଲିବ୍ରିଟିଙ୍କ ଭିଡ ଜମୁଛି, ହେଲେ ଦିନକୁ ଦିନ ମୃତ୍ୟୁ ସଂଖ୍ୟା ବଢି ଚାଲିଥିବା ବେଳେ ପରିସ୍ଥିତି ଜଟିଳ ହେବାରେ ଲାଗିଛି ।

ବର୍ତ୍ତମାନ ସୁଦ୍ଧା ରୋଗର ପ୍ରକୃତ କାରଣ ଜଣା ପଡିନଥିବା ବେଳେ ନିରାକରଣ କଥା ପଚାରେ ବା କିଏ ?

ଜାଣନ୍ତୁ ରୋଗର ଲକ୍ଷଣ ଓ ନିରାକରଣ ବିଷୟରେ...

• ଅଚାନକ ଅସୁସ୍ଥ
• ହଠାତ ଅଙ୍ଗ ପ୍ରତ୍ୟଙ୍ଗ ଅଚଳ
• ପ୍ରବଳ ଗରମ ଅନୁଭୁତ
• ଦେହ ତାତିରେ ଖଇ ଫୁଟିବା
• ମୁଣ୍ଡ ବିନ୍ଧିବା
• ତଣ୍ଟି ଦରଜ
• ବାନ୍ତି ଲାଗିବା
• ଭୋକ ନ ଲାଗିବା
• ଛୋଟ ଛୁଆଙ୍କ ମୁହଁରୁ ଝାଳ ବୋହିବା ଆଦି ରୋଗର ପ୍ରମୁଖ ଲକ୍ଷଣ ମାନ ।

ନିରାକରଣ

• ପୀଡିତ ଶିଶୁ ଶରୀରରେ ଜଳୀୟ ଅଂଶ କମିବାକୁ ଦେବା ନାହିଁ ।
• ପୀଡିତ ଶିଶୁକୁ ସ୍ବାସ୍ଥ୍ୟକର ଖାଦ୍ୟ ଖାଇବା ଦେବା ।
• ରାତିରେ ଖାଦ୍ୟ ଖାଇବା ପରେ ମିଠା ଖାଇବାକୁ ଦେବା ନିହାତି ଦରକାର ।
• ଶିଶୁଙ୍କୁ କିଛି ସମୟ ବ୍ୟବଧାନରେ ତରଳ ପଦାର୍ଥ ଦେବା ଜରୁରୀ, ଏହାଦ୍ବାରା ଦେହରେ ଜଳୀୟ ଅଂଶ କମିବ ନାହିଁ ।

କେଉଁ କାରଣ ପ୍ରତି ଧ୍ୟାନ ଦେବା ଆବଶ୍ୟକ

• ଶିଶୁଙ୍କୁ ଦୂଷିତ ପାଣି ଠାରୁ ଦୂରେଇ ରଖିବା ।
• ମଶା ଦାଉରୁ ରକ୍ଷା ପାଇବା ପାଇଁ ମଶାରୀ ଟାଙ୍ଗି ଶୋଇବା ସହ ଘରର ଆଖପାଖରେ ପାଣି ଜମିବାକୁ ଦେବେ ନାହିଁ ।
• ଖରାରୁ ଶିଶୁଙ୍କୁ ଦୂରେଇ ରଖିବେ ।
• ଜ୍ବର ହେବା ମାତ୍ରେ ବିଳମ୍ବ ନକରି ସଙ୍ଗେସଙ୍ଗେ ଡାକ୍ତରଖାନାରେ ଭର୍ତ୍ତି କରାଇବେ ।
• ଝଡାଫୁଙ୍କା ବା ଦେଶୀ ଚିକିତ୍ସା ନକରାଇ ନିକଟସ୍ଥ ମେଡିକାଲ ଡାକ୍ତରଙ୍କ ସହ ପରାମର୍ଶ କରାଇବେ ।

ବ୍ୟୁରୋ ରିପୋର୍ଟ, ଇଟିଭି ଭାରତ