ନାଭି ମୁମ୍ବାଇର ସ୍କୁଲ ନିକଟରୁ ଆଇଇଡି ଉଦ୍ଧାର

ସ୍କୁଲ ନିକଟରୁ ଆଇଇଡି ଭର୍ତ୍ତି ବାକ୍ସ ଉଦ୍ଧାର । ଘଟଣାସ୍ଥଳରେ ପହଞ୍ଚିଲା ପୋଲିସ ଏବଂ ବୋମା ନିଷ୍କ୍ରିୟ ଦଳ ।

ମୁମ୍ବାଇ: ନାଭି ମୁମ୍ବାଇର ଏକ ସ୍କୁଲ ନିକଟରୁ ଆଇଇଡି(ଇମ୍ପ୍ରୋଭାଇସଡ୍ ଏକ୍ସକ୍ଲୁସିଭ ଡିଭାଇସ୍) ଉଦ୍ଧାର କରିଛି ପୋଲିସ । ନାଭି ମୁମ୍ବାଇ କଲମବୋଲି ନିକଟରେ ଥିବା ସ୍କୁଲ ସାମନାରେ ଏକ ବାକ୍ସରେ ରହିଥିଲା ଆଇଇଡି । ତେବେ କିଏ ଏଠାରେ ଏହି ବାକ୍ସ ରଖିଛି ତାକୁ ଧରିବା ପାଇଁ ସିସିଟିଭି ଯାଞ୍ଚ କରୁଛି ପୋଲିସ ।

ସନ୍ଧାନୀ କୁକୁର ସହ ବୋମା ନିଷ୍କ୍ରିୟ ଦଳ ଘଟଣାସ୍ଥଳରେ ପହଞ୍ଚି ବାକ୍ସଟି ଉଦ୍ଧାର କରିଥିଲେ। ଘଟଣାସ୍ଥଳରୁ 5 ଲିଟର ପେଟ୍ରୋଲ, 12 ଭୋଲ୍ଟର ବ୍ୟାଟେରୀ ଏବଂ ଆନାଲଗ ଘଡି ମଧ୍ୟ ଜବତ କରାଯାଇଛି । ବର୍ତ୍ତମାନ ବୋମାଟିକୁ ନିଷ୍କ୍ରିୟ କରିବାରେ ଲାଗିଛନ୍ତି ଦଳ। ଆନାଲଗରେ ବୋମା ବିସ୍ଫୋରଣର ସମୟ 12 ଘଣ୍ଟା ରହିଥିବା ଦେଖିବାକୁ ମିଳିଛି।

ବାକ୍ସଟିର ଓଜନ 50 କିଲୋଗ୍ରାମ ଥିବା ଜଣାପଡିଛି। ବୋମା ନିଷ୍କ୍ରିୟକାରୀଦଳ ସିଆରପିଏଫ ଜବାନଙ୍କ ସାହାଯ୍ୟ ଲୋଡିଛନ୍ତି। ଲୋକଙ୍କୁ ଭୟଭୀତ କରିବା ପାଇଁ କେହି ଜଣେ ଏପରି କରିଥିବା ପୋଲିସ ସୂଚନା ଦେଇଛି।