ଚଣ୍ଡିଗଡ: ହରିୟାଣାରେ ପ୍ରଥମରୁ ଅଷ୍ଟମ ଶ୍ରେଣୀ ପଢୁଥିବା ସମସ୍ତ ଛାତ୍ରଛାତ୍ରୀଙ୍କୁ ପରବର୍ତ୍ତୀ ଶ୍ରେଣୀକୁ ଉତ୍ତୀର୍ଣ୍ଣ କରାଯାଇଛି । ଏନେଇ ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟର । ସେ କହିଛନ୍ତି ଯେ ଲକଡାଉନ ଯୋଗୁଁ ସମସ୍ତ ସ୍କୁଲ ବନ୍ଦ ରହିଛି ତେଣୁ ଛାତ୍ରଛାତ୍ରୀଙ୍କର ବାର୍ଷିକ ପରୀକ୍ଷା ହୋଇପାରିନାହିଁ । ଫଳରେ ସମସ୍ତଙ୍କୁ ପରବର୍ତ୍ତୀ ଶ୍ରେଣୀକୁ ଉତ୍ତୀର୍ଣ୍ଣ କରାଯାଇଛି ।
ଏହାସହ ସେ ଆହୁରି ମଧ୍ୟ କହିଛନ୍ତି ଯେ, ସ୍କୁଲ ଖୋଲିବା ପରେ ପ୍ରଥମରୁ ଅଷ୍ଟମ ଶ୍ରେଣୀରେ ପଢୁଥିବା ଛାତ୍ରଛାତ୍ରୀ ପରବର୍ତ୍ତୀ ଶ୍ରେଣୀରେ ନାମ ଲେଖାଇ ପାରିବେ ।
ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟର କହିଛନ୍ତି ଯେ, ଲକଡାଉନ ଯୋଗୁଁ ଦଶମ ଶ୍ରେଣୀରେ ପଢୁଥିବା ଛାତ୍ରଛାତ୍ରୀଙ୍କର ବିଜ୍ଞାନ ପେପର ପରୀକ୍ଷା ହୋଇପାରିନାହିଁ । ସେଥିପାଇଁ ଏହା ନିଷ୍ପତ୍ତି ନିଆଯାଇଛି ଯେ ଦଶମ ଶ୍ରେଣୀ ଛାତ୍ରଛାତ୍ରୀଙ୍କୁ ସେମାନଙ୍କ ଅନ୍ୟ ବିଷୟବସ୍ତୁରେ ଥିବା ମାର୍କ ଅନୁସାରେ ପରବର୍ତ୍ତୀ ଶ୍ରେଣୀକୁ ଉତ୍ତୀର୍ଣ୍ଣ କରାଯିବ ।
ତେବେ ମୁଖ୍ୟମନ୍ତ୍ରୀ ଏହା ସ୍ପଷ୍ଟ କରିଛନ୍ତି ଯେ ଯେତେବେଳେ ଏହି ପରିସ୍ଥିତି ଠିକ ହୋଇଯିବ ପୁଣି ଥରେ ବିଜ୍ଞାନ ପରୀକ୍ଷା କରାଯିବ । ସେହିପରି ଯୁକ୍ତ 2 ପ୍ରଥମ ବର୍ଷର ଛାତ୍ରଛାତ୍ରୀଙ୍କ ଗଣିତ ପରୀକ୍ଷା ହୋଇନଥିବା ବେଳେ ସେମାନଙ୍କ ଅନ୍ୟ ବିଷୟବସ୍ତୁରେ ଥିବା ମାର୍କ ଅନୁସାରେ ପରବର୍ତ୍ତୀ ଶ୍ରେଣୀକୁ ଉତ୍ତୀର୍ଣ୍ଣ କରାଯିବ ।
@ANI