ଆସୁଛନ୍ତି ଟ୍ରମ୍ପ, ପର୍ଯ୍ୟଟକଙ୍କ ପାଇଁ ଲାଗିବ ଏହି କଟକଣା

ଦୁଇ ଦିନିଆ ଭାରତ ଗସ୍ତରେ ଆସୁଛନ୍ତି ଆମେରିକା ରାଷ୍ଟ୍ରପତି । ଏହା ପୂର୍ବରୁ ଆଗ୍ରାରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଏହାସହ ପର୍ଯ୍ୟଟକଙ୍କ ପାଇଁ ବିଭିନ୍ନ କଟକଣା ମଧ୍ୟ ଲାଗୁ ହୋଇଛି ।

ନୂଆଦିଲ୍ଲୀ: ଆସନ୍ତା 24ରେ ଭାରତ ଗସ୍ତରେ ଆସୁଛନ୍ତି ଟ୍ରମ୍ପ ଦମ୍ପତି । ଏହି ଅବସରରେ ଉଭୟେ ତାଜମହଲ ବୁଲି ଯିବେ । ଏହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ କିଛି ନିଷ୍ପତ୍ତିରେ ପରିବର୍ତ୍ତନ କରାଯାଇଛି । ଫଳରେ ଏଥିରେ ପର୍ଯ୍ୟଟକଙ୍କୁ ଅସୁବିଧାର ସମ୍ମୁଖିନ ହେବାକୁ ପଡିପାରେ ।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଗସ୍ତକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଗଳିକନ୍ଦିରେ ପୋଲିସ ପକ୍ଷରୁ ଯାଞ୍ଚ କରାଯାଉଛି । ପୂର୍ବରୁ ଲୋକେ ତାଜମହଲ ଗେଟ୍ ପର୍ଯ୍ୟନ୍ତ ନିଜ ଗାଡିରେ ଯାଇପାରୁଥିଲେ । ହେଲେ ବର୍ତ୍ତମାନ ଗାଡିଗୁଡିକ ଗେଟ୍ ପର୍ଯ୍ୟନ୍ତ ଯାଇ ପାରିବ ନାହିଁ । ପ୍ରଶାସନ ତରଫରୁ ଏହି ନିୟମ ରବିବାରଠାରୁ ଲାଗୁ ହେବ ।