କେମିତି କାମ କରିବ ବିଶ୍ବର ପ୍ରଥମ କୋଭିଡ‌ ଟିକା ? ସ୍ପଷ୍ଟ କଲା ଋଷ

ଋଷ ଏବେ ଦୁନିଆର ପ୍ରଥମ କୋରୋନାଭାଇରସ୍ ଟିକା ଆରମ୍ଭ କରିବାକୁ ପ୍ରସ୍ତୁତ ଅଛି । ତେବେ ଏହି ଅବସରରେ ଉକ୍ତ ଟିକା କିପରି ସଫଳ ଭାବେ ଆକ୍ରାନ୍ତଙ୍କ ଠାରେ କାର୍ଯ୍ୟ କରିବ ସେ ସମ୍ପର୍କରେ ଗମାଲେଇ ପ୍ରତିଷ୍ଠାନର ମୁଖ୍ୟ ଆଲେକ୍ସଜ୍ୟାଣ୍ଡର ଗିଣ୍ଟସବର୍ଗ କିଛି ସୂଚନା ପ୍ରଦାନପୂର୍ବକ ସ୍ପଷ୍ଟ କରିଛନ୍ତି। ଅଧୁକ ପଢନ୍ତୁ...

ମସ୍କୋ: ଋଷ ଏବେ ଦୁନିଆର ପ୍ରଥମ କୋରୋନାଭାଇରସ୍ ଟିକା ଆରମ୍ଭ କରିବାକୁ ପ୍ରସ୍ତୁତ ଅଛି । ରୁଷିଆର ଗମାଲେଇ ଇନ୍‌ଷ୍ଟିଚ୍ୟୁଟ୍‌ ଅଫ୍ ଏପିଡର୍ମିଓଲୋଜି ଆଣ୍ଡ୍‌ ମାଇକ୍ରୋବାୟୋଲୋଜି ଏବଂ ଋଷ ପ୍ରତିରକ୍ଷା ମନ୍ତ୍ରଣାଳୟ ଦ୍ବାରା ବିକଶିତ ଏକ ଟିକା ଆସନ୍ତା ୧୨ ତାରିଖରେ ବିଶ୍ବର ପ୍ରଥମ କୋଭିଡ୍‌ ଟିକା ଭାବେ ସାର୍ବଜନୀନ ବ୍ୟବହାର ପାଇଁ ଲୋକାର୍ପିତ ହେବ ବୋଲି ରୁଷିଆର ଉପସ୍ବାସ୍ଥ୍ୟମନ୍ତ୍ରୀ ଓଲେଗ ଗ୍ରିଦନେଭ ଶୁକ୍ରବାର ଘୋଷଣା କରିଛନ୍ତି।

ତେବେ ଏହି ଅବସରରେ ଉକ୍ତ ଟିକା କିପରି ସଫଳ ଭାବେ ଆକ୍ରାନ୍ତଙ୍କ ଠାରେ କାର୍ଯ୍ୟ କରିବ ସେ ସମ୍ପର୍କରେ ଗମାଲେଇ ପ୍ରତିଷ୍ଠାନର ମୁଖ୍ୟ ଆଲେକ୍ସଜ୍ୟାଣ୍ଡର ଗିଣ୍ଟସବର୍ଗ କିଛି ସୂଚନା ପ୍ରଦାନପୂର୍ବକ ସ୍ପଷ୍ଟ କରିଛନ୍ତି। ଗିଣ୍ଟସବର୍ଗଙ୍କ କହିବା ଅନୁସାରେ, ଶ୍ବାସନଳୀର ଉପରିଭାଗକୁ ସଂକ୍ରମଣ କରିପାରୁଥିବା ଆଡିନୋଭୂତାଣୁଙ୍କୁ ପାଥେୟ କରି ଉକ୍ତ ଟିକାରେ ଏକ ପ୍ରକାର ନିର୍ଜୀବ କଣିକା ବ୍ୟବହାର କରାଯାଇଛି। ତେଣୁ ଏହି ଟିକା ମନୁଷ୍ୟର ସ୍ବାସ୍ଥ୍ୟ ପ୍ରତି ବିପଦ ସୃଷ୍ଟି କରିବାର ଆଶଙ୍କା ନାହିଁ। ଏହି ଆଡିନୋଭୂତାଣୁ ଦ୍ବାରା ସୃଷ୍ଟ ନିର୍ଜୀବ କଣିକାଗୁଡ଼ିକ କେବଳ ସଂପୃକ୍ତ କୋଭିଡ୍‌ ଭୂତାଣୁର ଗୁଣକୁ ପ୍ରତିପାଦନ କରିବା ସହ କୌଣସି ପରିସ୍ଥିତିରେ ବହୁଗୁଣିତ ହୋଇପାରିବେ ନାହିଁ। ସୁତରାଂ ମନୁଷ୍ୟ ଶରୀରରେ ସେମାନଙ୍କ ଉପସ୍ଥିତି ଦ୍ବାରା ଆବଶ୍ୟକ ରୋଗପ୍ରତିରୋଧକ ଆଣ୍ଟିଜେନ ବିକଶିତ ହୋଇପାରିବ ଯାହା କି କୌଣସି ଟିକାର ଅପରିହାର୍ଯ୍ୟ ଗୁଣ ଭାବେ ବିବେଚିତ।

ଟିକା ତିଆରିରେ ଜଡିତ ଅନ୍ୟ ଅନୁସନ୍ଧାନକାରୀଙ୍କ ସହ ଗିଣ୍ଟସବର୍ଗ ପ୍ରଥମେ ଏହାକୁ ନିଜେ ପରୀକ୍ଷା କରିଥିଲେ। ଅପରପକ୍ଷେ, ଯେ କେହି ବ୍ୟକ୍ତି ବି କୌଣସି ବି ଟିକା ନେଲା ପରେ ପ୍ରାକୃତିକ ଭାବେ ଶରୀରରେ ସାମାନ୍ୟ ଜ୍ବର ପରିଲକ୍ଷିତ ହୋଇଥାଏ। ତେବେ ସେପରି ଲକ୍ଷଣ କେବଳ ପାରାସିଟାମଲ୍‌ ଭଳି ସାଧାରଣ ଔଷଧ ସେବନରେ ହିଁ ଦୂର ହୋଇପାରିବ ବୋଲି ଗିଣ୍ଟସବର୍ଗ କହିଛନ୍ତି। ତେବେ ଋଷର ଟିକା ସମ୍ବନ୍ଧରେ କୌଣସି ସରକାରୀ ସୂଚନା କିମ୍ବା ତଥ୍ୟ ପାଇ ନାହାଁନ୍ତି ବୋଲି WHO ସମେତ ଅନେକ ବିଶେଷଜ୍ଞ କହିଛନ୍ତି ।