ଲକ୍ଷ୍ନୌ: ଅଯୋଧ୍ୟାରେ ଦୁଇ ଏପ୍ରିଲ ରାମନବମୀ ଦିନରୁ ମନ୍ଦିର ନିର୍ମାଣ କାର୍ଯ୍ୟ ଆରମ୍ଭ ହେବା ଯଥେଷ୍ଟ ସମ୍ଭାବନା ରହିଛି । କେନ୍ଦ୍ର ସରକାର ଏଥିପାଇଁ ଟ୍ରଷ୍ଟ ଗଠନ କରି ନାମ 'ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର' ରଖିଛନ୍ତି । ରାମ ମନ୍ଦିର ପୂର୍ଣ୍ଣାଙ୍ଗ ହେବା ପାଇଁ ଅନେକ ଦିନ ଲାଗିବାକୁ ଥିବା ବେଳେ ମନ୍ଦିର ନିର୍ମାଣ ଶେଷ ହେବା ପର୍ଯ୍ୟନ୍ତ ରାମଲାଲାଙ୍କୁ କାଠରେ ତିଆରି ବୁଲେଟ ପ୍ରୁଫ ଅସ୍ଥାୟୀ ମନ୍ଦିରରେ ପୂଜାର୍ଚ୍ଚନା କରାଯିବ ।
ସୂଚନା ଅନୁସାରେ ମନ୍ଦିର ନିର୍ମାଣ ପାଇଁ 'ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର' ଟ୍ରଷ୍ଟ ଗଠନ ପରେ ଏବେ ମନ୍ଦିର ଡିଜାଇନକୁ ନେଇ ଅନେକ ପ୍ରଶ୍ନ ସୃଷ୍ଟି ହୋଇଛି । ମନ୍ଦିର କେଉଁ ମଡେଲରେ ନିର୍ମାଣ ହେବ ? ବିଶ୍ବ ହିନ୍ଦୁ ପରିଷଦର 1987 ମଡେଲ ଅନୁସାରେ ଖମ୍ଭ ଉପରେ ନିର୍ମାଣ ହେବ ନା ନୂତନ ମଡେଲ ମୁତାବକ ନୂଆ ପଥରରେ ତିଆରି ହେବ ଏହା ଉପରେ ବୋର୍ଡ ଓ ଟ୍ରଷ୍ଟି ନିଷ୍ପତ୍ତି ନେବେ । ଆସନ୍ତା ସପ୍ତାହରେ ଏନେଇ ବୈଠକ ଅନୁଷ୍ଠିତ ହେବ ।
ଅଯୋଧ୍ୟାରେ ମନ୍ଦିର ନିର୍ମାଣ ପ୍ରକ୍ରିୟା ଆରମ୍ଭ ହେବା ମାତ୍ର 27 ବର୍ଷ ହେଲା ଟେଣ୍ଟରେ ବିରାଜମାନ ରାମଲାଲା କେଉଁଠାରେ ବିରାଜମାନ କରିବେ । ଏହା ଉପରେ ଏବେ ନିଷ୍ପତ୍ତି ନିଆଯାଇଛି । ଅଯୋଧ୍ୟା ମାମଲାରେ ଗୃହ ବିଭାଗ ଅଧିକାରୀଙ୍କ ସୂଚନା ଅନୁସାରେ ରାମଲାଲାଙ୍କୁ ଅବସ୍ଥାପିତ କରିବା ପାଇଁ କାଷ୍ଠରେ ନିର୍ମିତ ବୁଲେଟ ପ୍ରୁଫ ଅସ୍ଥାୟୀ ମନ୍ଦିରର ଦିଲ୍ଲୀରେ ପ୍ରସ୍ତୁତ ହୋଇଛି । ବାତାନୁକୂଳ ଏହି ବୁଲେଟ ପ୍ରୁଫ ମନ୍ଦିରରେ ରହିବେ ରାମଲାଲା ।
ରାମ ମନ୍ଦିର 106 ଖମ୍ବ ଉପରେ ଦୁଇ ମହଲା ବିଶିଷ୍ଟ ହେବ । ଏଥିପାଇଁ 60ରୁ 70 ପ୍ରତିଶତ ପଥର ପ୍ରସ୍ତୁତ ହୋଇ ରହିଛି । ବିଶ୍ବ ହିନ୍ଦୁ ପରିଷଦ ମଡେଲକୁ ବାଦ ଦେଇ ମନ୍ଦିର ନିର୍ମାଣ କରାଗଲେ , ଏହା ପୂର୍ଣ୍ଣାଙ୍ଗ ପ୍ରାପ୍ତ ହେବା ପାଇଁ 25 ବର୍ଷ ସମୟର ଲାଗିପାରେ ।
ମନ୍ଦିର ନିର୍ମାଣ ପାଇଁ ବିଶ୍ବ ହିନ୍ଦୁ ପରିଷଦ ମଡେଲ ଓ ନୂତନ ମଡେଲକୁ ସମର୍ଥନ ଓ ବିରୋଧକୁ ନେଇ ଭିନ୍ନ ଭିନ୍ନ ତର୍କ ରହିଛି । ବିଶ୍ବ ହିନ୍ଦୁ ପରିଷଦ ମଡେଲ ଅନୁସାରେ ବିଶେଷଜ୍ଞଙ୍କ ମତ ଭିନ୍ନ ରହିଛି । ଏହି ମଡେଲ ଅନୁଯାୟୀ ମନ୍ଦିର ଭବ୍ୟ ପରିଦୃଶ୍ୟ ହେବ ନାହିଁ ବୋଲି କହିଛନ୍ତି ବିଶେଷଜ୍ଞ ଦଳ । ଏଥିପାଇଁ ନୂତନ ମଡେଲକୁ ବିଚାରକୁ ନିଆଯିବା ଉଚିତ ବୋଲି ସେମାନେ ମତ ରଖିଛନ୍ତି ।
