କର୍ଣ୍ଣାଟକ ସଙ୍କଟରେ କମ୍ପିଲା ସଂସଦ, ଜବାବ ଦେଲେ ରାଜନାଥ

କର୍ଣ୍ଣାଟକ ରାଜନୈତିକ ସଂକଟକୁ ନେଇ ଲୋକସଭାରେ ହୋଇଛି ତର୍କ ବିତର୍କ । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଧ୍ୟ ଏହାର ଜବାବ ଦେଇଛନ୍ତି । କର୍ଣ୍ଣାଟକ ନାଟକରେ ବିଜେପି ଏବଂ କେନ୍ଦ୍ର ସରକାରଙ୍କ କୌଣସି ହାତ ନଥିବା କହିଛନ୍ତି ରାଜନାଥ ।

ନୂଆଦିଲ୍ଲୀ: କଂଗ୍ରେସ-ଜେଡିଏସର 13 ଜଣ ବିଧାୟକ ଇସ୍ତଫା ଦେବା ପରେ କର୍ଣ୍ଣାଟକରେ ଜାରି ରହିଛି ରାଜନୈତିକ ସଂକଟ । ସଂସଦରେ ଉଠିଛି କର୍ଣ୍ଣାଟକ ଝଡ । ଏହି ପ୍ରସଙ୍ଗରେ ମୁହଁ ଖୋଲିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ଏଠାରେ ଚାଲିଥିବା ନାଟକରେ ବିଜେପି ଏବଂ କେନ୍ଦ୍ର ସରକାରଙ୍କ କୌଣସି ଭୂମିକା ନାହିଁ । ବରଂ ରାହୁଲଙ୍କ ପଥ ଅନୁସରଣ କରୁଛନ୍ତି ତାଙ୍କ ନେତା ।

ଏହା କଂଗ୍ରେସର ଭିତରି କଥା । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଠାରୁ ହିଁ ଇସ୍ତଫା ପର୍ବ ଆରମ୍ଭ ହୋଇଛି । ରାହୁଲଙ୍କ ଇସ୍ତଫା ପରେ ଜଣକ ପରେ ଜଣେ ବରିଷ୍ଠ କଂଗ୍ରେସ ନେତାମାନେ ମଧ୍ୟ ଇସ୍ତଫା ଦେଲେ । ଏଥିରେ ବିଜେପିର କୌଣସି ହାତ ନଥିବା କହିଛନ୍ତି ରାଜନାଥ ।

ସେପଟେ କଂଗ୍ରେସ ସାଂସଦ ଅଧିର ରଞ୍ଜନ ଚୌଧୁରୀ ବିଜେପିକୁ ଟାର୍ଗେଟ କରି କହିଥିଲେ, ‘ବିଜେପି ନିକଟରେ 300ଟି ଆସନ ରହିଛି, ତଥାପି ଦଳର ପେଟ ପୁରିନି । ଯଦି ମୋ ଘର ଅସୁରକ୍ଷିତ ଅଛି, ଆଉ ମୋ ଘରେ 10ଟି ସୁନା ଏବଂ 10ଟି ରୂପାର ପଇସା ଅଛି, ତେବେ ଏହାର ଅର୍ଥ ଏହା ନୁହେଁ ଯେ ଆପଣ ମୋ ଘରୁ ଆସି ସୁନା ଚୋରି କରି ନେଇଯିବେ ।’