ପବନରେ ଗୋଲ-ଗୋଲ ଘୁରି ବୁଲିଲା ବିଜେପି ସାଂସଦଙ୍କ ହେଲିକପ୍ଟର

ଭାରତୀୟ ଜନତା ପାର୍ଟିର ସାଂସଦ ମହନ୍ତ ବାଲକନାଥଙ୍କ ହେଲିକପ୍ଟର ନିୟନ୍ତ୍ରଣ ହରାଇ ଗୋଟିଏ ସ୍ଥାନରେ ଗୋଲ ଗୋଲ ଘୁରି ବୁଲୁଥିବା ଦେଖିବାକୁ ମିଳିଛି । ହେଲିକପ୍ଟରଟି ଉଡ଼ାଣ ଭରିବା ସମୟରେ ନିୟନ୍ତ୍ରଣ ହରାଇଥିବା ଫଳରେ ଏଭଳି ହୋଇଥିଲା ।

ଜୟପୁର: ରାଜସ୍ଥାନ ଅଲୱରରେ ରବିବାର ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଭାରତୀୟ ଜନତା ପାର୍ଟିର ସାଂସଦ ମହନ୍ତ ବାଲକନାଥଙ୍କ ହେଲିକପ୍ଟର ନିୟନ୍ତ୍ରଣ ହରାଇ ଗୋଟିଏ ସ୍ଥାନରେ ଗୋଲ ଗୋଲ ଘୁରି ବୁଲୁଥିବା ଦେଖିବାକୁ ମିଳିଛି । ହେଲିକପ୍ଟରଟି ଉଡ଼ାଣ ଭରିବା ସମୟରେ ନିୟନ୍ତ୍ରଣ ହରାଇଥିବା ଫଳରେ ଏଭଳି ହୋଇଥିଲା । ତେବେ ପାଇଲଟଙ୍କ ଉପସ୍ଥିତ ବୁଦ୍ଧି ଯୋଗୁଁ ସାଂସଦ ମହନ୍ତ ବାଲକନାଥ ଏକ ବଡ଼ ଦୁର୍ଘଟଣାରୁ ବର୍ତ୍ତି ଯାଇଥିଲେ ।

ସୂଚନା ମୁତାବକ, ରବିବାର ବିଜେପି ସାଂସଦ ମହନ୍ତ ବାଲକନାଥ ନିଜ ସଂସଦୀୟ କ୍ଷେତ୍ର କୋଟ କାସିମ ଅଞ୍ଚଳର ଏକ ମନ୍ଦିରକୁ ଯାଇଥିଲେ । ତେବେ ଫେରିବା ସମୟରେ ଯେତେବେଳେ ତାଙ୍କ ହୋଲିକପ୍ଟର ଉଡ଼ାଣ ଆରମ୍ଭ କରିଥିଲା ସେତେବେଳେ ଏକ ଅଦ୍ଭୁଦ ଘଟଣା ଦେଖିବାକୁ ମିଳିଥିଲା । ହେଲିକପ୍ଟରଟି ଭୂପୃଷ୍ଠରୁ କିଛି ଦୂର ଉପରକୁ ଯିବା ପରେ ଗୋଲ ଗୋଲ ବୁଲିବା ଆରମ୍ଭ କରିଥିଲା । ହେଲିକପ୍ଟରଟି ନା ଉପରକୁ ଯାଉଥିଲା ନା ତଳକୁ ଆସୁଥିଲା ।

ତେବେ ଏଭଳି ଘଟଣା ଦେଖି ସେଠାରେ ଉପସ୍ଥିତ ଲୋକ ଭୟଭୀତ ହୋଇଯାଇଥିଲେ । କିନ୍ତୁ ପାଇଲଟ ଜଣକ ପରିସ୍ଥିତିକୁ ସମ୍ଭାଳି ନେଇଥିଲେ । ସେ ଠିକ୍‌ ସମୟରେ ହେଲିକପ୍ଟରକୁ ନିୟନ୍ତ୍ରଣ କରିଥିଲେ ।