ନୂଆଦିଲ୍ଲୀ: କୋରୋନା ଭାଇରସ ଦେଶରେ ଦିନକୁ ଦିନ ଆତଙ୍କ ସୃଷ୍ଟି କରୁଛି । ଅର୍ଥବ୍ୟବସ୍ଥାକୁ ଫେରାଇ ଆଣିବା ପାଇଁ ଅନଲକକୁ ଧିରେ ଧିରେ କୋହଳ ଦିଆଯାଉଥିବାରୁ ପ୍ରତିଦିନ ନୂଆ ମାମଲା ସାମ୍ନାକୁ ଆସୁଛି । ଦେଶର ଆର୍ଥିକ ରାଜଧାନୀ ମୁମ୍ବାଇରେ ଏହି ମାମଲା ଏକ ଲକ୍ଷ ଅତିକ୍ରମ କରିସାରିଛି । ସେହିପରି ରାଜଧାନୀରେ ପ୍ରତ୍ୟେକ ଦିନ ନୂଆ ରେକର୍ଡ ଭାଙ୍ଗୁଛି । ଏଭଳି ପରିସ୍ଥିତିରେ ବିରୋଧୀମାନେ ସରକାରଙ୍କୁ ଟାର୍ଗେଟ କରିବାରେ ଲାଗିଛନ୍ତି ।
କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧି ଶୁକ୍ରବାର କୋରୋନା ସଙ୍କଟକୁ ନେଇ ମୋଦି ସରକାରଙ୍କୁ ଟାର୍ଗେଟ କରିଛନ୍ତି । ରାହୁଲ ଏକ ଟ୍ବିଟରେ କୋରୋନା ଗ୍ରାଫକୁ ସେୟାର କରି ଲେଖିଛନ୍ତି ଯେ, "ଭାରତ ଏକ ଭୁଲ ଦୌଡ ଜିତିବା ରାସ୍ତାରେ ଅଛି । ଅହଂକାର ଏବଂ ଅକ୍ଷମତାର ଘାତକ ମିଶ୍ରଣ ଯୋଗୁଁ ଏକ ଭୟଙ୍କର ଦୁଃଖଦ ଘଟଣା ମୁଣ୍ଡ ଟେକିଛି" । ଏହି ଟ୍ବିଟରେ ରାହୁଲ ଗାନ୍ଧୀ ଏକ 20 ସେକେଣ୍ଡ ଭିଡିଓ ମଧ୍ୟ ସେୟାର କରିଛନ୍ତି ।