ନୂଆଦିଲ୍ଲୀ: ଗୁରୁବାର ସଂସଦର ସେଣ୍ଟ୍ରାଲ୍ ହଲ୍ ଠାରେ ରାଜ୍ୟସଭା ଏବଂ ଲୋକସଭାର ମିଳିତ ଅଧିବେସନକୁ ସମ୍ବୋଧିତ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ଏହି ଅବସରରେ ରାଷ୍ଟ୍ରପତି ଦେଶର ବିକାଶ ଏବଂ ନିର୍ମାଣରେ ନିର୍ବାଚିତ ଜନପ୍ରତିନିଧି ସକ୍ରିୟତାର ସହ ସାମିଲ ହେବାକୁ ଆହ୍ବାନ ଦେଇଛନ୍ତି । ଆଜି ଦିନ 11ଟା ସମୟର ଉଭୟ ଗୃହର ସଦସ୍ୟଙ୍କୁ ସମ୍ବୋଧିତ କରିଛନ୍ତି ସେ ।
ସମାଜରେ ଥିବା ଅନେକ ଗୁରୁତ୍ବପୂର୍ଣ୍ଣ ସମସ୍ୟାର ସମାଧାନ କରିବା ଦିଗରେ ମତାମତ ରଖିଛନ୍ତି ରାଷ୍ଟ୍ରପତି । ଟ୍ରିପଲ ତଲାକ୍, ନିକାହା-ହଲାଲା ଭଳି କୁପ୍ରଥାର ମୂଳତ୍ପାଟନ ପାଇଁ ଜନପ୍ରତିନିଧି ସେମାନଙ୍କର ସମର୍ଥନକୁ ପରିବ୍ୟାପ୍ତ କରିବାର ଆବଶ୍ୟକତା ରହିଛି । ମହିଳାଙ୍କ ଅଧିକାରକୁ କ୍ଷୁର୍ଣ୍ଣ କରୁଥିବା ବ୍ୟବସ୍ଥାକୁ ବନ୍ଦ କରିବାର ଆବଶ୍ୟକ ହୋଇପଡିଛି । ମହିଳା ସଶକ୍ତିକରଣ ବିନା କୌଣସି ଦେଶ ପ୍ରଗତି ପଥରେ ଅଗ୍ରସର ହୋଇପାରିବ ନାହିଁ । ସରକାର ଏହା ଉପରେ ଗୁରୁତ୍ବ ଦେବା ଆବଶ୍ୟକ ବୋଲି ରାଷ୍ଟ୍ରପତି କହିଛନ୍ତି ।
ନିଜର ସମ୍ବୋଧନରେ ରାଷ୍ଟ୍ରପତି ଦେଶରେ ଦେଖାଦେଇଥିବା ଉତ୍କଟ ଜଳ ସମସ୍ୟା କଥା ଉଠାଇଛନ୍ତି । ନଦୀ, ପୋଖରୀ ଏବଂ ହ୍ରଦ ଭଳି ଜଳାଶୟରେ ଜଳସ୍ତର କମିବାରେ ଲାଗିଛି । ବର୍ତ୍ତମାନ ଦେଖାଦେଇଥିବା ଏଭଳି ସମସ୍ୟାର ସମାଧାନ ପାଇଁ ଜଳ ସଂରକ୍ଷଣ କରିବା ଆବଶାମ୍ଭାବୀ ହୋଇପଡିଛି । ଯାହା ଦ୍ବାରା ଭବିଷ୍ୟତ ପୀଢି ଏହାର ଲାଭ ଉଠାଇ ପାରିବ । ଜଳ ସଙ୍କଟର ସମାଧାନ ପାଇଁ କେନ୍ଦ୍ର ସରକାରଙ୍କ ପକ୍ଷରୁ "ଜଳଶକ୍ତି ମନ୍ତ୍ରଣାଳୟ" ଗଠନ ଏକ ଅଭିନବ ପ୍ରୟାସ ।
ଦେଶର ଯୁବବର୍ଗଙ୍କ ରୋଜଗାର ଏବଂ ଶିକ୍ଷା ପାଇଁ ବିଗତ ପାଞ୍ଚ ବର୍ଷ ମଧ୍ୟରେ କେନ୍ଦ୍ର ସରକାରଙ୍କ ପକ୍ଷରୁ ନିଆଯାଇଥିବା ବିଭିନ୍ନ ପଦକ୍ଷେପକୁ ପ୍ରଂଶସା କରିଛନ୍ତି ରାଷ୍ଟ୍ରପତି । ଆତ୍ମନିଯୁକ୍ତି ପାଇଁ ପ୍ରଧାନମନ୍ତ୍ରୀ ମୁଦ୍ରା ଯୋଜନା ମାଧ୍ୟମରେ 19 କୋଟି ଋଣ ବଣ୍ଟନ କରାଯାଇଛି । ଏହା ଦ୍ବାରା ପ୍ରାୟ 30 କୋଟି ଲୋକଙ୍କ ନିକଟରେ ରୋଜଗାରର ସୁଯୋଗ ପହଞ୍ଚା ଯାଇପାରିବ। ବ୍ୟବସାୟ ପାଇଁ ବିନା ଗ୍ୟାରେଣ୍ଟରରେ ବ୍ୟବସାୟୀଙ୍କୁ 50 ଲକ୍ଷ ଟଙ୍କା ପର୍ଯ୍ୟନ୍ତ ସହୟତା ଯୋଗାଇ ଦିଆଯାଉଥିବା କହିଛନ୍ତି ।
ଚଳିତ ସପ୍ତଦଶ ଲୋକସଭା ନିର୍ବାଚନରେ ଏକ ସ୍ପଷ୍ଟ ଜନାଦେଶ ମିଳିଥିବା କହିଛନ୍ତି ରାଷ୍ଟ୍ରପତି । ପ୍ରଥମ ଦଫାର କାର୍ଯ୍ୟକୁ ପରୀକ୍ଷା କରିବା ପରେ ଲୋକେ ଏପରି ସମର୍ଥନ ଦେଇଛନ୍ତି ବୋଲି ସେ ଜଣାଇଛନ୍ତି । ବିକାଶକୁ ଦେଖି ଭାରତବର୍ଷରେ ଏପରି ଜନମତ ମିଳିଛି ବୋଲି ଦର୍ଶାଇଛନ୍ତି । ଦେଶର ପ୍ରତ୍ୟେକ ନାଗରିକଙ୍କ ଜୀବନଧରଣର ମାନକୁ ଉନ୍ନତ କରିବା ଦିଗରେ ସଫଳତା ହାସଲ କରିବା ଦିଗରେ ଅଗ୍ରସର ହେଉଛନ୍ତି ।
ରାଷ୍ଟ୍ରୀୟ ସୁରକ୍ଷା ଦିଗରେ କେନ୍ଦ୍ର ସରକାର ଜାଗ୍ରତ ଅଛନ୍ତି । ଖାସ୍ କରି ଆତଙ୍କବାଦ ଦମନ ପ୍ରସଙ୍ଗରେ ସରକାରଙ୍କ ଆଭିମୁଖ୍ୟଙ୍କୁ ପ୍ରଶଂସା କରିଛନ୍ତି ରାଷ୍ଟ୍ରପତି । ଏ ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସ୍ବରୂପ ମସୁଦ ଆଜହର ଭଳି ଆତଙ୍କୀ ଆକ୍ରମଣ କରିବା ପାଇଁ ମାଷ୍ଟରପ୍ଲାନ୍ ପ୍ରସ୍ତୁତ କରୁଥିବା ଲୋକକୁ ବିଶ୍ବ ଆତଙ୍କବାଦୀ ବୋଲି ଘୋଷଣା କରାଯାଇଛି । ପିଓକେ ସର୍ଜିକାଲ ଷ୍ଟ୍ରାଇକ ଏବଂ ବାଲାକୋଟ ଏୟାରଷ୍ଟ୍ରାଇକ ଆତଙ୍କବାଦୀଙ୍କ ପାଇଁ ଉଚିତ ଜବାବ ବୋଲି କହିଛନ୍ତି ରାଷ୍ଟ୍ରପତି ।
"ୱାନ ନେସନ୍, ୱାନ ଇଲେକସନ" ଉପରେ ପ୍ରତିକ୍ରିୟା ରଖି ରାଷ୍ଟ୍ରପତି କହିଛନ୍ତି ସଂସଦ ସମସ୍ତ ସାଂସଦ ଏହା ଉପରେ ବିଚାର କରନ୍ତୁ । ଏପରି ବ୍ୟବସ୍ଥା କାର୍ଯ୍ୟକାରୀ ହେବା ଦ୍ବାରା ଦେଶରେ ବିକାଶ ପଥର ସୁରୁଖୁରୁରେ ଅଗ୍ରସର ହୋଇପାରିବ ବୋଲି ରାଷ୍ଟ୍ରପତି ଜଣାଇଛନ୍ତି ।
