ଗୁଜୁରାଟ: ଏଠାକାର ଆନନ୍ଦ ଜିଲ୍ଲାର ପେଟଲାଡ ପୌରପରିଷଦ ପ୍ଲାଷ୍ଟିକରୁ ମୁକ୍ତି ପାଇବା ପାଇଁ ନେଇଛି ଏକ ଅଭିନବ ପ୍ରୟାସ । ସିଙ୍ଗଲ ୟୁଜ ପ୍ଳାଷ୍ଟିକରୁ ତେଲ ପ୍ରସ୍ତୁତ କରିବା ନେଇ ଅଭିନବ । ଅତ୍ୟଧିକ ପ୍ଲାଷ୍ଟିକ ବର୍ଯ୍ୟବସ୍ତୁ ସୃଷ୍ଟି ହେବା ସାରା ବିଶ୍ବ ପାଇଁ ଚିନ୍ତାର କାରଣ ହୋଇଥିବା ବେଳେ କେବଳ 5 ପ୍ରତିଶତ ବର୍ଜ୍ୟବସ୍ତୁର ପୂନଃଚକ୍ରଣ ହୋଇ ପାରୁଛି । ଏଥିରୁ ଜଣା ପଡୁଛି ଯେ ପ୍ରତି ମୂହୁର୍ତ୍ତରେ ପ୍ଲାଷ୍ଟିକ ପୃଥିବୀ ପାଇଁ ଏକ ବିକଟ ସମସ୍ୟାରେ ପରିଣତ ହୋଇଛି ।
ପ୍ଲାଷ୍ଟିକରୁ ତେଲ ଉତ୍ପାଦନର ଅଭିନବ ଉପାୟ ନିଜ ଜିଲ୍ଲାରେ ନିମ୍ନ ମାନର ପ୍ଲାଷ୍ଟିକ ବ୍ୟବହାରକୁ କମ କରିବା ପାଇଁ ପେଟଲାଡ ପୌରପରିଷଦ ଏକ ପ୍ରଚେଷ୍ଠା ଆରମ୍ଭ କରିଛି । ଏଥିପାଇଁ ପୌରପିଷଦର ସ୍ବୟଂ ସେବକ ମାନେ ପ୍ରତି ଘରକୁ ଯାଇ ପ୍ଲାଷ୍ଟିକ ଆବର୍ଜନା ସଂଗ୍ରହ କରନ୍ତି । ଏହାପରେ ତାହାର ପୃଥକୀକରଣ କରାଯାଇଥାଏ ।
ପେଟଲାଡ ପୌରପରିଷଦର ଯେଉଁ ସ୍ଥାନରେ ପ୍ଲାଷ୍ଟିକ ସବୁ ଜମା କରାଯାଏ ସେଠାରେ ଏକ ପ୍ଲାଷ୍ଟିକ ପାଇରୋଲିସିସ ପ୍ଲାଣ୍ଟ ସ୍ଥାପନ କରାଯାଇଛି । ଏହି ପ୍ଲାଣ୍ଟ ସାହାଯ୍ୟରେ ପ୍ଲାଷ୍ଟିକରୁ ବ୍ୟବହାର ଯୋଗ୍ୟ ତୈଳ ଉତ୍ପନ୍ନ କରାଯାଇଥାଏ । ପରବର୍ତ୍ତୀ ସମୟରେ ଏହି ତୈଳକୁ ଧିମା ଗତିର ଚାଲୁଥିବା ଇଞ୍ଜିନରେ ବ୍ୟବହୃତ ହେବା ସହ ଏହାକୁ ବିକ୍ରି ମଧ୍ୟ କରାଯାଇଥାଏ । ତେବେ ଯେତେବେଳେ ଏହି ପ୍ଲାଣ୍ଟଟିରେ ରକ୍ଷଣାବେକ୍ଷଣ ଚାଲିଥାଏ, ସଂଗୃହିତ ପ୍ଲାଷ୍ଟିକ ସବୁକୁ ଭିନ୍ନ ଏକ ଅନୁଷ୍ଠାନକୁ ହସ୍ତାନ୍ତର କରେ ପୌରପରିଷଦ । ବଦଳରେ ସେହି ଅନୁଷ୍ଠାନ ପେଟଲାଡ ପୌରପରିଷଦକୁ ବିଭିନ୍ନ ସାଜସଜ୍ଜା ସାମଗ୍ରୀ ତଥା ବଗିଚାରେ ବସିବା ପାଇଁ ଉପକରଣ ସବୁ ଦେଇଥାଏ ।
ପେଟଲାଡ ପୌରପରିଷଦ କେବଳ ଯେ ସହରକୁ ପ୍ଲାଷ୍ଟିକ ମୁକ୍ତ କରିବାର ସଂକଳ୍ପ ନେଇଛି ତହା ନୁହେଁ, ସେହି ପ୍ଲାଷ୍ଟିକରୁ ସ୍ବଳ୍ପ ବ୍ୟୟରେ ଏକ ବ୍ୟବହାର ଯୋଗ୍ୟ ଉତ୍ପାଦ ମଧ୍ୟ ଉତ୍ପନ୍ନ କରି ପାରୁଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
