ଇସଲାମାବାଦ: କୋରୋନା ମୁକାବିଲା ପାଇଁ ସାରା ବିଶ୍ବରେ ଚାଲିଛି ପ୍ରସ୍ତୁତି । ସଚେତନତା ବାର୍ତ୍ତା, ସଫାସୁତୁରା ରହିବା ଅଭ୍ୟାସ କରିବା, ଅନ୍ୟଙ୍କ ସହ କରମର୍ଦ୍ଦନ ନକରିବା, ଛିଙ୍କିବା ବା କାଶିବା ସମୟରେ ହାତ ବା ରୁମାଲରେ ମୁହଁ ବନ୍ଦ କରିବା ଆଦି । ଏନେଇ ସାରା ବିଶ୍ବରେ ବିଭିନ୍ନ ଉପାୟରେ ଲୋକଙ୍କ ସଚେତନ କରାଯାଉଥିବା ବେଳେ ଘଡିସନ୍ଧି ମୁହୂର୍ତ୍ତରେ ନରମିଛି ପାକିସ୍ତାନ । ଆଉ ବିଶ୍ବ ପାଇଁ ମାହାମାରୀ ସାବ୍ୟସ୍ତ ହୋଇଥିବା କୋରୋନାର ମୁକାବିଲା ପାଇଁ ଭାରତ ସହ ହାତ ମିଶାଇବାର ସଙ୍କେତ ଦେଇଛି ।
ବର୍ତ୍ତମାନ ସୁଦ୍ଧା ଏହି ମାରାତ୍ମକ ରୋଗର କବଳରେ 100 ଦେଶ ଆସିଥିବା ବେଳେ ଭାରତ ଓ ପାକିସ୍ତାନରେ ଆକ୍ରାନ୍ତ ସଂଖ୍ୟା ଯଥାକ୍ରମେ 76 ଓ 20 ରହିଛି । କିନ୍ତୁ ଯଦି ଏହାକୁ ରୋକିବାର ଉପାୟ ଯଥାଶୀଘ୍ର ଖୋଜାନଯାଏ ତେବେ ଏହା ଆହୁରି ମାରାତ୍ମକ ହେବ ବୋଲି ଆଶଙ୍କା ପ୍ରକାଶ କରିଛି ୱାର୍ଲଡ ହେଲ୍ଥ ଅର୍ଗାନାଇଜେସନ (WHO) । ଗୁରୁବାର ଭାରତରେ କୋରୋନାରେ ପ୍ରଥମ ମୁଣ୍ଡ ଗଡିଥିବା ବେଳେ ଏନେଇ ପାକିସ୍ତାନକୁ ପଚରାଯିବାରୁ ଆବଶ୍ୟକସ୍ଥଳେ ପାକିସ୍ତାନ ପଡୋଶୀ ରାଷ୍ଟ୍ରଙ୍କ ସହ ହାତ ମିଶାଇବାକୁ ପ୍ରସ୍ତୁତ ଥିବା ପ୍ରକାଶ କରିଛନ୍ତି ଇସଲାମାବାଦ ବୈଦେଶିକ କାର୍ଯ୍ୟାଳୟ ପ୍ରବକ୍ତା ଆଇସା ଫାରୁକି ।