ନୂଆଦିଲ୍ଲୀ:ନେପାଳ ରାସ୍ତାରେ ପାକିସ୍ତାନ । ମଙ୍ଗଳବାର ବିବାଦୀୟ ମାନଚିତ୍ରକୁ ପାକିସ୍ତାନର ଇମ୍ରାନ ଖାନ ସରକାର ଅନୁମୋଦନ କରିଛନ୍ତି। ମାନଚିତ୍ରରେ ପାକିସ୍ତାନ କାଶ୍ମୀରକୁ ନିଜର ବୋଲି ବର୍ଣ୍ଣନା କରିଛି । ପୂର୍ବରୁ ପାକିସ୍ତାନ କେବଳ PoK କୁ ଏହାର ଅଂଶ ବୋଲି କହୁଥିଲା କିନ୍ତୁ ବର୍ତ୍ତମାନ କାଶ୍ମୀରକୁ ନୂତନ ମାନଚିତ୍ରରେ ଅନ୍ତର୍ଭୁକ୍ତ କରିଛି । ନୂଆ ମାନଚିତ୍ରରେ ଗୁଜୁରାଟର ଜୁନାଗଡ, ଲଦାଖ, ସିଆଚେନ ପାକିସ୍ତାନର ବୋଲି ଦାବି କରିଛି ।
ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଏହାକୁ ପାକିସ୍ତାନ ଇତିହାସରେ ଏକ ଐତିହାସିକ ଦିନ ବୋଲି କହିଛନ୍ତି । ବିବାଦୀୟ ମାନଚିତ୍ରକୁ ଇମ୍ରାନ ଖାନଙ୍କ କ୍ୟାବିନେଟରେ ଅନୁମୋଦନ କରିଛି । କ୍ୟାବିନେଟ ବୈଠକ ପରେ ଇମ୍ରାନ ଖାନ ଏକ ନୂତନ ରାଜନୈତିକ ମାନଚିତ୍ର ପ୍ରକାଶ କରିଛନ୍ତି । ମାନଚିତ୍ରରେ କାଶ୍ମୀରକୁ ପାକିସ୍ତାନର ଏକ ଅଂଶ ଭାବରେ ବର୍ଣ୍ଣନା କରାଯାଇଛି।
ପାକିସ୍ତାନ ପୂର୍ବରୁ ନେପାଳ ମଧ୍ୟ ଏଭଳି କାର୍ଯ୍ୟ କରିଛି। ସେ ମଧ୍ୟ ଏକ ବିବାଦୀୟ ମାନଚିତ୍ରକୁ ଅନୁମୋଦନ କରିଛି । ଏଥିରେ କଳାପାଣି, ଲିପୁଲେଖ ଓ ଭାରତର ଲିମ୍ପିୟାଧୁରା ଅନ୍ତର୍ଭୁକ୍ତ। ନେପାଳ 20 ମେ’ ରେ ବିବାଦୀୟ ମାନଚିତ୍ର ପ୍ରକାଶ କରିଥିଲା, ଯାହାକୁ ସେଠାକାର ସଂସଦ ମଧ୍ୟ ଅନୁମୋଦନ କରିଛି । ମିଳିତ ଜାତିସଂଘ ସଂଘ ଓ ଗୁଗୁଲ ସମେତ ଅନ୍ତର୍ଜାତୀୟ ସମ୍ପ୍ରଦାୟକୁ ଏହି ବିବାଦୀୟ ମାନଚିତ୍ର ପଠାଇବାକୁ ସେ ବର୍ତ୍ତମାନ ପ୍ରସ୍ତୁତ ହେଉଛି ।
ଜମ୍ମୁ କାଶ୍ମୀରରୁ ଧାରା 370 ଅପସାରଣର ଗୋଟିଏ ବର୍ଷ ପୂରଣ ହେବାକୁ ଯାଉଛି । ଏହାର ଗୋଟିଏ ଦିନ ପୂର୍ବରୁ ପାକିସ୍ତାନ ଏହି ବିବାଦୀୟ ମାନଚିତ୍ର ପ୍ରକାଶ କରିଛି । ଗତ ବର୍ଷ ଅଗଷ୍ଟ 5 ରେ ମୋଦି ସରକାର ଜମ୍ମୁ କାଶ୍ମୀରରୁ ଧାରା 370 ହଟାଇ ଐତିହାସିକ ନିଷ୍ପତ୍ତି ନେଇଥିଲେ । ଭାରତର ପଦକ୍ଷେପ ପରେ ପାକିସ୍ତାନ ବିଚଳିତ ହେବା ସହିତ ସମଗ୍ର ବିଶ୍ବରେ ଭାରତକୁ ଘେରିବାକୁ ଯାଇ ବିଫଳ ହୋଇଥିଲା ।
