ନୂଆଦିଲ୍ଲୀ: ଭାରତ-ଚୀନ ସୀମା ବିବାଦ ମଧ୍ୟରେ ବଡ ଖବର ସାମ୍ନାକୁ ଆସିଛି । ଗଲୱାନ ଘାଟିରୁ ଚୀନ ସୈନିକ ପ୍ରାୟ 2 କିମି ପଛକୁ ହଟିଛନ୍ତି । ତେବେ ଏହି ଘଟଣା ପୂର୍ବରୁ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଚୀନ ବୈଦେଶିକ ମନ୍ତ୍ରୀ ୱାଙ୍ଗ ୟୀଙ୍କ ସହ ଆଲୋଚନା କରିଥିଲେ। ଉଭୟଙ୍କ ଏହି ଆଲୋଚନା ରବିବାର ଭିଡିଓ କଲ ଜରିଆରେ ହୋଇଥିଲା । ଏହି ଆଲୋଚନା ସକରାତ୍ମକ ଏବଂ ଭବିଷ୍ୟତରେ ଉଠାଇବାକୁ ଥିବା ପଦକ୍ଷେପକୁ ନେଇ ହୋଇଥିବା ବୈଦେଶିକ ମନ୍ତ୍ରାଳୟ ପକ୍ଷରୁ ଜାରି ବୟାନରେ କୁହାଯାଇଛି ।
ବୈଦେଶିକ ମନ୍ତ୍ରାଳୟ ପକ୍ଷରୁ ଜାରି ବୟାନରେ କୁହାଯାଇଛି, ଅଜିତ ଡୋଭାଲ ଏବଂ ୱାଙ୍ଗ ୟିଙ୍କ ମଧ୍ୟରେ ହୋଇଥିବା ବାର୍ତ୍ତାଳାପର ମୁଖ୍ୟ କେନ୍ଦ୍ରବିନ୍ଦୁ ଉଭୟ ଦେଶ ମଧ୍ୟରେ ଶାନ୍ତି ସ୍ଥାପନ ଥିଲା । ଏହା ବ୍ୟତୀତ ଭବିଷ୍ୟତରେ ଏହିପରି ଘଟଣାକୁ ଏଡାଇବା ପାଇଁ ମିଳିତ ଭାବରେ କାର୍ଯ୍ୟ କରିବା ଉପରେ ଉଭୟଙ୍କ ମଧ୍ୟରେ ଚର୍ଚ୍ଚା ହୋଇଥିଲା । ଭାରତ-ଚୀନ ସୀମାବର୍ତ୍ତୀ ପାଶ୍ଚାତ୍ୟ କ୍ଷେତ୍ରର ସାମ୍ପ୍ରତିକ ବିକାଶକୁ ନେଇ ଉଭୟ ଖୋଲା ଏବଂ ଗଭୀର ମତ ଆଦାନପ୍ରଦାନ କରିଥିଲେ । ଶାନ୍ତିର ପୁନରୁଦ୍ଧାର ପାଇଁ ଏଲଏସି ଏବଂ ଭାରତ-ଚୀନ ସୀମାବର୍ତ୍ତୀ ଅଞ୍ଚଳରୁ ସୈନ୍ୟ ପ୍ରତ୍ୟାହାର ଆବଶ୍ୟକ ବୋଲି ଉଭୟ ନେତାଙ୍କ ମଧ୍ୟରେ ସହମତି ହୋଇଥିଲା ।