ନୂଆଦିଲ୍ଲୀ: ନିର୍ବାଚନ ପାଖେଇ ଆସୁଥିବାବେଳେ ପ୍ରଚାର ଓ ପ୍ରସାରରେ ମାତିଛନ୍ତି ସମସ୍ତ ରାଜନୈତିକ ଦଳ। ଏହି ଅବସରରେ ନିଜ ‘ମେଁ ଭି ଚୌକିଦାର’ ଅଭିଯାନକୁ ଜୋରଦାର କରଛି ବିଜେପି। ଆଜି ଅପରାହ୍ନରେ ଅଡିଓ ବ୍ରିଜ ଟେକ୍ନୋଲୋଜି ଦ୍ବାରା ଦେଶର ୨୫ ଲକ୍ଷ ଚୌକିଦାରଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଭିଭାଷଣ ପ୍ରଦାନ କରିବେ।
କିଛି ଦିନ ତଳେ ଆରମ୍ଭ ହୋଇଥିବା ଏହି ଅଭିଯାନ ଏବେ ସାରା ଦେଶରେ ଲୋକପ୍ରିୟ ପାଲଟିଛି। ନିଜ ନାମ ଆଗରେ ଚୌକିଦାର ଲଗାଇ ଟ୍ବିଟରରେ ସମସ୍ତେ ନାମ ପରିବର୍ତ୍ତନ କରୁଛନ୍ତି । ପୂର୍ବରୁ ପ୍ରଧାନମନ୍ତ୍ରୀ ମୋଦି ନିଜ ଟ୍ବିଟ ହ୍ୟାଣ୍ଡେଲରେ ‘ଚୌକିଦାର’ ଯୋଗ କରିବା ପରେ ଗତ ଶନିବାର ବିଜେପି ପାର୍ଟି ‘ମେଁ ଭି ଚୌକିଦାର’ ଅଭିଯାନ ଆରମ୍ଭ କରିଥିଲା। ଏଥିପାଇଁ ଦଳ ଏକ ଗୀତ ମଧ୍ୟ ରିଲିଜ କରିଥିଲା । ଯାହା ଲୋକଙ୍କ ମଧ୍ୟରେ ଖୁବ ଆଦୃତ ହୋଇଥିଲା।
ଏହି ଅବସରରେ ଆଜି ମୋଦି ଅପରାହ୍ନ 4ଟା 30ରେ ଦେଶର 25 ଲକ୍ଷ ଚୌକିଦାରଙ୍କୁ ସମ୍ବୋଧନ କରିବେ। ଏହାସହ ଏମାନଙ୍କୁ ସେ ହୋଲିର ଶୁଭକାମନା ଦେବେ। ହୋଲିର ବିଭିନ୍ନ ରଙ୍ଗ ସେ ସେମାନଙ୍କ ସହ ସେୟାର କରିବେ। ଅଡିଓ ବ୍ରିଜ ଟେକ୍ନୋଲୋଜି ଦ୍ବାରା ମୋଦି ଏହି ଚୌକିଦାରଙ୍କ ସହ ଯୋଡି ହେବେ । ତେବେ ଏଥିପାଇଁ ଆଜି ବିଜେପି ପକ୍ଷରୁ ‘ମେଁ ଭି ଚୌକିଦାର’ କଲର ଟ୍ୟୁନ ଲଞ୍ଚ ହୋଇଛି।
ପୁଣି ଆସନ୍ତା ମାର୍ଚ୍ଚ ୩୧ ତାରିଖରେ ମୋଦି ପୁଣିଥରେ ଦେଶର ଚୌକିଦାରଙ୍କ ସହ ଯୋଡି ହେବେ। ୫୦୦ଟି ସ୍ଥାନର ନିରାପତ୍ତା କର୍ମଚାରୀଙ୍କୁ ସେ ଭିଡିଓ କନଫରେନ୍ସ ଯୋଗେ ଅଭିଭାଷଣ ଦେବାର କାର୍ଯ୍ୟକ୍ରମ ରହିଛି । ଗତକାଲି କେନ୍ଦ୍ରମନ୍ତ୍ରୀ ରବି ଶଙ୍କର ପ୍ରସାଦ ଦାବି କରିଥିଲେ ଯେ ‘ମେଁ ଭି ଚୌକିଦାର’ ୨୦ ଲକ୍ଷ ଥର ହ୍ୟାସ ଟାଗ୍ ହେବା ସହ ଟ୍ବିଟ ହୋଇ ଏକ ଗଣ ଆନ୍ଦୋଳନ ପାଲଟିଲାଣି। ଏହାକୁ 1 କୋଟି ଲୋକ ବ୍ୟବହାର କରିଛନ୍ତି ବୋଲି ସେ କହିଛନ୍ତି।
