ନୂଆଦିଲ୍ଲୀ: ଭାରତ ଗସ୍ତରେ ମଙ୍ଗଳବାର ଆସି ପହଞ୍ଚିଛନ୍ତି ସାଉଦି ଆରବ ଯୁବରାଜ ମହମ୍ମଦ ବିନ ସଲମାନ ବିନ ଅବ୍ଦୁଲ ଅଜୀଜ ଉଲ ସାଉଦ । ସେ ୨ ଦିନିଆ ଭାରତ ଗସ୍ତରେ ଆସିଛନ୍ତି । ଏହାପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରୋଟକୋଲ ଭାଙ୍ଗି ତାଙ୍କୁ ସ୍ବାଗତ କରିବା ପାଇଁ ବିମାନ ବନ୍ଦରକୁ ଯାଇଥିଲେ । ସାଉଦି ପ୍ରିନ୍ସ ସଲମାନଙ୍କ ଏହି ଗସ୍ତରେ ଆତଙ୍କବାଦୀ ପ୍ରମୁଖ ବିଷୟ ରହିଛି । ଭାରତ-ସାଉଦି ସଂଯୁକ୍ତ ପ୍ରେସ କନଫରେନ୍ସରେ ଆତଙ୍କବାଦୀ ବିରୋଧରେ ଲଢିବା କଥା ଦୁଇ ଦେଶର ପ୍ରମୁଖ କହଛନ୍ତି ।
ଏହାସହ ଦୁଇ ଦେଶ ମଧ୍ୟରେ ନ୍ୟାସନାଲ ଇନଭେଷ୍ଟ ଫଣ୍ଡରେ ନିବେଶ, ପର୍ଯ୍ୟଟନ, ହାଉସିଂ କର୍ପୋରେସନ, ବ୍ରଡକାଷ୍ଟିଂ ପରି ୫ଟି କ୍ଷେତ୍ରରେ ଚୁକ୍ତି ସ୍ବାକ୍ଷରିତ ହୋଇଛି । ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ସାଉଦି ସହ ଭାରତର ସମ୍ବନ୍ଧ ବହୁତ ପୁରୁଣା । ୨୦୧୬ ସାଉଦି ଗସ୍ତରେ ମୁଁ ଶକ୍ତି ଓ ସୁରକ୍ଷା କ୍ଷେତ୍ରରେ ବହୁ ବଡ ପଦକ୍ଷେପ ନେଇଛି । ଭାରତର ଉର୍ଜା ସୁରକ୍ଷାରେ ସାଉଦି ଆରବର ମହତ୍ତ୍ବପୂର୍ଣ୍ଣ ଭୂମିକା ରହିଛି । ସାଉଦି ସହ ଆର୍ଥିକ ସହଯୋଗ ଉପରେ ଆଲୋଚନା କରାଯାଇଛି । ଆମେ ଆନ୍ତର୍ଜାତୀୟ ସୌରଶକ୍ତି ଆଲିଏନ୍ସରେ ସାଉଦି ଆରବକୁ ସ୍ବାଗତ କରୁଛୁ ବୋଲି ସେ କହିଛନ୍ତି ।