ଭୋପାଳ: ମଧ୍ୟପ୍ରଦେଶ ରାଜନୀତିରେ ବଦଳୁଥିବା ସମୀକରଣରେ ଆଜିର ଦିନ ବହୁତ ଗୁରୁତ୍ବପୂର୍ଣ୍ଣ ମନେ କରାଯାଉଛି । କାରଣ ଗତକାଲି ରାତିରେ କମଲନାଥ ସରକାରଙ୍କ ସମସ୍ତ ମନ୍ତ୍ରୀ ଇସ୍ତଫା ଦେବା ପରେ ଆଜି ଉଭୟ ବିଜେପି ଓ କଂଗ୍ରେସ ନିଜ ନିଜର ବିଧାୟକ ଦଳ ବୈଠକ ଡାକିଛନ୍ତି । ଯେଉଁଥିରେ କିଛି ବଡ ଘୋଷଣା କରାଯାଇପାରେ । ଆଜିର ବୈଠକ ହିଁ ସ୍ଥିର କରିପାରେ ଆଗାମୀ ଦିନରେ କିଏ କରିବ ମଧ୍ୟପ୍ରଦେଶରେ ରାଜ । କମଲନାଥ ନିଜ ଆସନ ବଞ୍ଚାଇ ପାରିବେ ନା ‘କମଲ’ ବାହିନୀ ଏହାକୁ ନିଜ ଆଡକୁ ନେଇଯିବ ।
ଆଜି ସନ୍ଧ୍ୟା 5ଟାରେ ବିଜେପି ଡାକିଥିବା ବିଧାୟକ ଦଳ ବୈଠକରେ ଦଳର ରଣନୀତି ଓ ବର୍ତ୍ତମାନର ସ୍ଥିତି ଉପରେ ଆଲୋଚନା କରାଯାଇପାରେ । ଏହାସହ କମଲନାଥ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବା ନେଇ ବି ନିଷ୍ପତ୍ତି ହୋଇପାରେ ବୋଲି ଚର୍ଚ୍ଚା ହେଉଛି । ଏହି ବୈଠକରେ ଯୋଗଦେବା ଲାଗି ପାଖାପାଖି ଏକସପ୍ତାହରୁ ଅଧିକ ସମୟ ଦିଲ୍ଲୀରେ ରହିଥିବା ବିଜେପି ନେତା ଶିବରାଜ ସିଂ ଚୌହାନ ଭୋପାଳରେ ପହଞ୍ଚିଛନ୍ତି ।