ଥିରୁଅନନ୍ତପୁରମ: ଘଟିଛି ପ୍ରତୀକ୍ଷାର ଅନ୍ତ । ଦୀର୍ଘ ଦିନ ପରେ ଦୁଃଖୀ ମୁହଁରେ ଫୁଟିଛି ହସ । ମିଳିଛି ରହିବା ପାଇଁ ଛାତ । ଏ ହେଉଛି କେରଳରେ ରବିବାର ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମର ଦୃଶ୍ୟ । ଯେଉଁଥିରେ କେରଳ ବନ୍ୟା ପୀଡିତଙ୍କୁ ହସ୍ତାନ୍ତର କରାଯାଇଛି ସେମାନଙ୍କ ପାଇଁ ପ୍ରସ୍ତୁତ ହୋଇଥିବା ଘରର ଚାବି । ଇନ୍ନାଡୁ- ରାମୋଜୀ ଗ୍ରୁପ ଦ୍ବାରା କେରଳ ମୁଖ୍ୟମନ୍ତ୍ରୀଙ୍କୁ ଦିଆଯାଇଥିବା ସଂଗୃହୀତ ପାଣ୍ଠିରୁ ପ୍ରସ୍ତୁତ 121ଟି ଘର ଏବେ ଏହି ପୀଡିତଙ୍କୁ ମିଳିଛି ।
ରବିବାର ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ପିନାରାୟୀ ବିଜୟନଙ୍କ ସମେତ ଅନେକ ନେତା ଓ ମନ୍ତ୍ରୀ ଯୋଗ ଦେଇଥିଲେ । ତେବେ କାର୍ଯ୍ୟକ୍ରମରେ ଉଦବୋଧନ ଦେଉଥିବା ସମୟରେ ମୁଖ୍ୟମନ୍ତ୍ରୀ ବିଜୟନ ରାମୋଜୀ ଗ୍ରୁପକୁ ସହାୟତା ପାଇଁ ଧନ୍ୟବାଦ ଜଣାଇଛନ୍ତି । ସେ ଏହା ମଧ୍ୟ କହିଛନ୍ତି କି ବନ୍ୟା ପୀଡିତଙ୍କ ପାଇଁ ଅନେକ ସହାୟତା ମିଳିଛି ସତ ହେଲେ ରାମୋଜୀ ଗ୍ରୁପର ନିଆରା ଉଦ୍ୟମ ଆଜି ବାସହରାଙ୍କୁ ମୁଣ୍ଡ ଗୁଞ୍ଜିବାକୁ ଘର ଯୋଗାଇଛି । ଏହା ବାସ୍ତବରେ ପ୍ରଶଂସନୀୟ । ଏଥିସହ ଆଗାମୀ ଦିନରେ ମଧ୍ୟ କେରଳ ସରକାର ବିଭିନ୍ନ ଗଠନାତ୍ମକ ପ୍ରକଳ୍ପରେ ରାମୋଜୀ ଗ୍ରୁପର ସହାୟତା ଆଶା କରୁଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ ବିଜୟନ ।
ବ୍ୟୁରୋ ରିପୋର୍ଟ, ଇଟିଭି ଭାରତ