ନୂଆଦିଲ୍ଲୀ: ଦେଶକୁ ସ୍ତବ୍ଧ କରିଦେଇଥିବା କଠୁଆ ଗଣଦୁଷ୍କର୍ମ ଓ ହତ୍ୟା ମାମଲାରେ ପଠାନକୋର୍ଟ ଜିଲ୍ଲା ଦୌରାଜଜ୍ 3 ଜଣ ଦୋଷୀଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି । ସେମାନଙ୍କୁ ଏକ ଲକ୍ଷ ଟଙ୍କାର ଜୋରିମାନା ଦଣ୍ଡରେ ବି ଦଣ୍ଡିତ କରିଛନ୍ତି ଅଦାଲତ । ସେପଟେ ଏହି ଘଟଣାରେ ପ୍ରମାଣ ନଷ୍ଟ କରିଥିବା ଅନ୍ୟ 3 ଜଣ ପୋଲିସ କର୍ମୀଙ୍କୁ ୫ ବର୍ଷ ଲେଖାଏଁ ଜେଲ୍ ଦଣ୍ଡାଦେଶ ଶୁଣାଇଛନ୍ତି । ଏହା ସହ ପୋଲିସ କର୍ମୀମାନେ 50 ହଜାର ଲେଖାଏଁ ଜୋରିମାନା ଦେବା ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି ।
ଏହା ପୂର୍ବରୁ ସକାଳେ ଶୁଣାଣିରେ 7 ଜଣ ଅଭିଯୁକ୍ତଙ୍କ ମଧ୍ୟରୁ 6 ଜଣଙ୍କୁ ଦୋଷୀସାବ୍ୟସ୍ତ କରିଥିଲେ କୋର୍ଟ । ସେମାନେ ହେଲେ ଗାଁ ମୁଖିଆ ସାଞ୍ଜି ରାମ, ଦୁଇ ପୋଲିସ ଏସପିଓ ଦୀପକ ଖଜୁରିୟା ଏବଂ ସୁରେନ୍ଦ୍ର ବର୍ମା, ହେଡ କନେଷ୍ଟବଳ ତିଲକ ରାଜ, ଆନନ୍ଦ ଦତ୍ତ ଏବଂ ପରବେଶ କୁମାର । ସେପଟେ ଏହି ମାମଲାରେ ମୁଖିଆ ସାଞ୍ଜି ରାମଙ୍କ ପୁଅ ବିଶାଲକୁ ଅଦାଲତ ଦୋଷମୁକ୍ତ କରିଥିଲେ । ତେବେ ସାଞ୍ଜି ରାମ, ଦୀପକ ଖଜୁରିୟା ଏବଂ ପରବେଶ କୁମାରକୁ ଧାରା 302(ହତ୍ୟା), 376(ଗଣଦୁଷ୍କର୍ମ), 120 ବି(ଷଡଯନ୍ତ୍ର) ଏବଂ 363( ପ୍ରମାଣ ନଷ୍ଟ ) ଅଧିନରେ ଆଜୀବନ କାରାଦଣ୍ଡାଦେଶ ଦିଆ ଯାଇଛି ।