'କଂଗ୍ରେସ ଶବ୍ଦକୋଷରେ ପ୍ରେମର ଅର୍ଥ ପିଏମଙ୍କୁ ଗାଳି'

କଂଗ୍ରେସ ଶବ୍ଦକୋଷରେ ମୋଦିଙ୍କ ପାଇଁ କେବେ ଗଦାଫି ଓ ମୁସୋଲିନି ବାହାରୁଛି ତ ଆଉ କେବେ ହିଟଲର ଭଳି ଶବ୍ଦ । କୁରୁକ୍ଷେତ୍ରର ଏକ ଜନସଭାରେ ଭାବୁକ ହୋଇ ଏଭଳି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ନୂଆଦିଲ୍ଲୀ: ପ୍ରେମ ନାଁରେ ପିଏମଙ୍କୁ ଗାଳି ଦେଉଛି କଂଗ୍ରେସ । ବିରୋଧୀ ଦଳର ପ୍ରେମ ଭରା ଶବ୍ଦକୋଷରେ ମୋଦିଙ୍କ ପାଇଁ ରହିଛି ଭିନ୍ନ ଭିନ୍ନ ପ୍ରକାରର ଗାଳି । ମୋଦି କେବେ ଗଦାଫି ଓ ମୁସୋଲିନି ତ କେବେ ହିଟଲର ସାଜୁଛନ୍ତି କଂଗ୍ରେସ ପାଇଁ । କୁରୁକ୍ଷେତ୍ରର ଏକ ଜନସଭାରେ ଭାବୁକ ହୋଇ ଏଭଳି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ପ୍ରଧାନମନ୍ତ୍ରୀ ହେବା ପରେ କଂଗ୍ରେସ ତାଙ୍କୁ କି କି ଉପହାର ଦେଇଛି ସେ ନେଇ ମଧ୍ୟ ମୋଦି ଏହି ରାଲିରେ କହିଛନ୍ତି । କେବେ ତାଙ୍କୁ ବୋକା କୁହାଯାଉଛି ତ ଆଉ କେବେ ଯବାନଙ୍କ ରକ୍ତର ଦଲାଲ ବୋଲି କୁହାଯାଉଛି । ମୋଦିଙ୍କୁ ଗାଳି ଦେବା ପାଇଁ କଂଗ୍ରେସ ବାରମ୍ବାର ମର୍ଯ୍ୟାଦାର ଉଲଙ୍ଘନ କରୁଥିବା ସେ କହିଛନ୍ତି ।

ସୂଚନା ଯୋଗ୍ୟ ଯେ, ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ବିଷୟରେ ମୋଦି ଟିପ୍ପଣି ଦେବା ପରେ କଂଗ୍ରେସ ଏବଂ ବିଜେପି ମଧ୍ୟରେ ରାଜନୈତିକ ଯୁଦ୍ଧ ବଢି ଯାଇଛି । ଉଭୟେ ପରସ୍ପର ବିରୁଦ୍ଧରେ ବିଭିନ୍ନ ଆରୋପ ଲଗାଉଛନ୍ତି ।