ଝାଡଖଣ୍ଡରେ ଜୁଲାଇ 31 ଯାଏଁ ବଢିଲା ଲକଡାଉନ ଅବଧି

ବଢୁଥିବା କୋରୋନା ସଂକ୍ରମଣକୁ ନଜରରେ ରଖି ଶୁକ୍ରବାର ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି ଝାଡଖଣ୍ଡ ସରକାର । ରାଜ୍ୟରେ କୋରୋନା ଜନିତ ଲକଡାଉନ ଅବଧିକୁ ଆଗାମୀ ଜୁଲାଇ 31 ଯାଏଁ ବଢାଇବାକୁ ଘୋଷଣା କରିଛନ୍ତି ସରକାର ।

ରାଞ୍ଚି: ବଢୁଥିବା କୋରୋନା ସଂକ୍ରମଣକୁ ନଜରରେ ରଖି ଶୁକ୍ରବାର ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି ଝାଡଖଣ୍ଡ ସରକାର । ପ୍ରଥମେ ପଶ୍ଚିମବଙ୍ଗ ସରକାର ଏନେଇ ନିଷ୍ପତ୍ତି ନେଇସାରିଥିବା ବେଳେ ଦ୍ବିତୀୟରେ ଝାଡଖଣ୍ଡ ସରକାର ମଧ୍ୟ ନେଇଛନ୍ତି ସମାନ ପଦକ୍ଷେପ । ରାଜ୍ୟରେ କୋରୋନା ଜନିତ ଲକଡାଉନ ଅବଧିକୁ ଆଗାମୀ ଜୁଲାଇ 31 ଯାଏଁ ବଢାଇବାକୁ ଘୋଷଣା କରିଛନ୍ତି ସରକାର ।

ସୂଚନା ଅନୁଯାୟୀ 94ତମ ଦିନରେ ଦେଶରେ ଲକଡାଉନ ପହଞ୍ଚିଥିବା ବେଳେ କୋରୋନା ସଂକ୍ରମଣ କମିବା ବଦଳରେ ବଢିବଢି ଚାଲିଛି । ଦେଶରେ ଏଯାବତ୍‌ 4.9 ଲକ୍ଷ ସଂକ୍ରମଣ ମାମଲା ସାମ୍ନାକୁ ଆସିଥିବା ବେଳେ ମୃତ୍ୟୁ ସଂଖ୍ୟା 15,301ରେ ପହଞ୍ଚିଛି । ଦେଶରେ 58.25 ପ୍ରତିଶତ ହାରରେ ଆକ୍ରାନ୍ତମାନେ ସୁସ୍ଥ ହେଉଥିବା ବେଳେ କେତେକ ରାଜ୍ୟରେ ବର୍ତ୍ତମାନ ସକ୍ରିୟ ସଂଖ୍ୟାଠାରୁ ସୁସ୍ଥଙ୍କ ସଂଖ୍ୟା ଅଧିକ ରହିଥିବା ଦେଖାଯାଇଛି । ମହାରାଷ୍ଟ୍ର, ଦିଲ୍ଲୀ ଓ ତାମିଲନାଡୁରେ ଏଯାବତ୍‌ ସର୍ବାଧିତ ସଂଖ୍ୟକ ଆକ୍ରାନ୍ତ ଦେଖାଦେଇଛନ୍ତି ।

ଏପରି ସ୍ଥିତିରେ ନିଜ ରାଜ୍ୟରେ ସଂକ୍ରମଣ ରୋକିବା ପାଇଁ ଝାଡଖଣ୍ଡ ସରକାର ଶୁକ୍ରବାର ଲକଡାଉନ ଅବଧି ଜୁଲାଇ 31 ଯାଏଁ ବୃଦ୍ଧି କରିଥିବା ଘୋଷଣା କରିଛନ୍ତି । ଗୁରୁବାର ସୁଦ୍ଧା ଝାଡଖଣ୍ଡରେ 2261 ଟି ମାମଲା ସାମ୍ନାକୁ ଆସିସାରିଥିବା ବେଳେ ବର୍ତ୍ତମାନ 644ଟି ସକ୍ରିୟ ମାମଲା ରହିଛି । ରାଜ୍ୟରେ କୋରୋନା ସଂକ୍ରମଣ ଯୋଗୁଁ 12 ଜଣ ପ୍ରାଣ ହରାଇଥିବା ଜଣା ପଡିଛି ।