ପାଟନା: ନେତାଙ୍କୁ ଜନତାଙ୍କ ଭକ୍ତି ଓ ସେବା ଭାବର ଚରମ ଉଦାହରଣ । ହାଲିଆ ହୋଇଯାଇଥିବା ନେତାଙ୍କ ପଦ ମର୍ଦ୍ଦନ କରୁଛନ୍ତି ଜନତା ଜନାର୍ଦ୍ଦନ । ବିଧାୟକଙ୍କ କ୍ଲାନ୍ତି ଦୁର କରିବା ପାଇଁ ଗୋଡମୋଡି ଦେଉଛନ୍ତି ସମର୍ଥକ । ବିହାରର ରାଜଧାନୀ ପାଟନାରେ ସତ୍ତାଧାରୀ ଜେଡି(ୟୁ) ରାଲିରେ ସଭାମଞ୍ଚ ତଳେ ଏଭଳି କିଛି ଭାବବିହ୍ବଳ କରୁଥିବା ଦୃଶ୍ୟ ଦେଖିବାକୁ ମିଳିଛି ।
ସୂଚନାଅନୁସାରେ ବିହାରର ରାଜଧାନୀ ପାଟନାର ଗାନ୍ଧୀ ମୈଦାନରେ ଜେଡିୟୁ ରାଲି ଅନୁଷ୍ଠିତ ହୋଇଥିଲା ଏବଂ ମୁଖ୍ୟମନ୍ତ୍ରୀ ନୀତୀଶ କୁମାର ମଞ୍ଚରେ ସମ୍ବୋଧିତ କରୁଥିଲେ । ଅନ୍ୟ ପଟେ ଦଳର ଜଣେ ବିଧାୟକ ଗାନ୍ଧୀ ମୈଦାନରେ ବିଶ୍ରାମ ନେଉଥିଲେ । ବିଧାୟକ କୁଶଲ ଯାଦବ ତାଙ୍କ ଦଳର କର୍ମୀ ପାଦ ଚିପି ଦେଉଥିବା ଭିଡିଓରେ ଏହା ସ୍ପଷ୍ଟ ଭାବେ ଦେଖିବାକୁ ମିଳିଛି । ବିଧାୟକ ହାଲିଆ ହୋଇ ଶୋଇଥିବା ବେଳେ ଦଳର କର୍ମୀମାନେ ପତାକା ଧରି ବସିଛନ୍ତି ଓ ବିଧାୟକଙ୍କ ଗୋଡ ମୋଡି ଦେଉଛନ୍ତି ।
ଏଠାରେ ସୂଚନା ଯୋଗ୍ୟ ଯେ, ବିହାର ମୁଖ୍ୟମନ୍ତ୍ରୀ ଏବଂ ଜେଡିୟୁ ସଭାପତି ନୀତୀଶ କୁମାର ଗାନ୍ଧୀ ମୈଦାନରେ ଦଳୀୟ କର୍ମୀଙ୍କୁ ସମ୍ବୋଧିତ କରି ଏନଡିଏକୁ ଏକଜୁଟ ହେବାକୁ ଆହ୍ବାନ ଦେଉଥିଲେ । ଚଳିତ ବର୍ଷ ଶେଷ ଆଡକୁ ବିହାର ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି ।