ଭାରତୀୟ ବାୟୁସେନା ଦିବସ 2020: ଜାଣନ୍ତୁ କ’ଣ ରହିଛି ବିଶେଷତ୍ବ...

ପ୍ରତିବର୍ଷ ଅକ୍ଟୋବର 8ରେ ପାଳନ ହୁଏ ଭାରତୀୟ ବାୟୁସେନାର ପ୍ରତିଷ୍ଠା ଦିବସ । ଭାରତୀୟ ବାୟୁସେନା ଦିବସ ଭାବେ ଜଣା ଯାଉଥିବା ଏହି ଦିନଟିର ରହିଛି ଗୁରୁତ୍ବପୂର୍ଣ୍ଣ ତାତ୍ପର୍ଯ୍ୟ । ଭାରତୀୟ ସୈନ୍ୟ ଶକ୍ତିର ଏକ ପ୍ରମୁଖ ତଥା ଶକ୍ତିଶାଳୀ ଅଙ୍ଗ ଭାବେ ଦେଶରେ ସୁରକ୍ଷା ଦିଗରେ ଭାରତୀୟ ବାୟୁସେନାର ରହିଛି ଗୁରୁତ୍ବପୂର୍ଣ୍ଣ ଭୂମିକା ।

ପ୍ରତିବର୍ଷ ଅକ୍ଟୋବର 8ରେ ପାଳନ ହୁଏ ଭାରତୀୟ ବାୟୁସେନାର ପ୍ରତିଷ୍ଠା ଦିବସ । ଭାରତୀୟ ବାୟୁସେନା ଦିବସ ଭାବେ ଜଣା ଯାଉଥିବା ଏହି ଦିନଟିର ରହିଛି ଗୁରୁତ୍ବପୂର୍ଣ୍ଣ ତାତ୍ପର୍ଯ୍ୟ । ଭାରତୀୟ ସୈନ୍ୟ ଶକ୍ତିର ଏକ ପ୍ରମୁଖ ତଥା ଶକ୍ତିଶାଳୀ ଅଙ୍ଗ ଭାବେ ଦେଶରେ ସୁରକ୍ଷା ଦିଗରେ ଭାରତୀୟ ବାୟୁସେନାର ରହିଛି ଗୁରୁତ୍ବପୂର୍ଣ୍ଣ ଭୂମିକା । ତେବେ ଏହି ଦିନ ପାଳନ ପଛରେ ଉଦ୍ଦେଶ୍ୟ ହେଉଛି ଦେଶର ବିଭିନ୍ନ କୋଣ ଅନୁକୋଣର ଲୋକଙ୍କୁ ଭାରତୀୟ ବାୟୁସେନା ବିଷୟରେ ସମ୍ୟକ ଜ୍ଞାନ ପ୍ରଦାନ କରିବା ।

ଚଳିତବର୍ଷ ଭାରତୀୟ ବାୟୁସେନା ନିଜର 88 ତମ ପ୍ରତିଷ୍ଠା ଦିବସ ପାଳନ କରୁଥିବା ବେଳେ ଜାଣନ୍ତୁ ଏନେଇ କିଛି ଅଜଣା କଥା:

• 1932 ମସିହା, ଅକ୍ଟୋବର 8 ତାରିଖରେ ପ୍ରତିଷ୍ଠା ହୋଇଥିଲା ଭାରତୀୟ ବାୟୁସେନା । ଏହା ଅଧୀନରେ ପ୍ରଥମ ଏସି ବିମାନ 1933 ମସିହା, ଏପ୍ରିଲ 1ରେ କାର୍ଯ୍ୟକ୍ଷମ ହୋଇଥିଲା । ସେ ସମୟରେ ବ୍ରିଟିଶ ସରକାର ଭାରତ ଉପରେ ନିଜର ଶାସନ ଜାରି ରଖିଥିବା ବେଳେ ସେମାନେ ଏହାର ନାମ ରଖିଥିଲେ ‘ରୟାଲ ଇଣ୍ଡିଆନ ଏୟାର ଫୋର୍ସ’ ।
• ଦେଶ ସ୍ବାଧୀନ ହେବା ପରେ ଅର୍ଥାତ 1950 ମସିହାରେ ଏହାର ନାମ ଭାରତୀୟ ବାୟୁ ସେନା ବା ଇଣ୍ଡିଆନ ଏୟାର ଫୋର୍ସକୁ ପରିବର୍ତ୍ତିତ ହୋଇଥିଲା । ସେବେଠାରୁ ଏହା ଅନେକ ଯୁଦ୍ଧ ପରିସ୍ଥିତିର ସାମ୍ନା କରିଥିବା ବେଳେ ଏଥିରେ ବର୍ତ୍ତମାନ ସୁଦ୍ଧା 1500 ଏୟାରକ୍ରାଫ୍ଟ ଓ 1 ଲକ୍ଷ 70 ହଜାର କର୍ମଚାରୀ ସାମିଲ ହୋଇଛନ୍ତି ।
• ଆମେରିକା, ଋଷିଆ ଓ ଚୀନ ପରେ ଭାରତୀୟ ବାୟୁସେନା ହେଉଛି ବିଶ୍ବର 4ର୍ଥ ବୃହତ୍ତମ ବାୟୁସେନା ।
• ଭାରତରେ ସମସ୍ତ ସେନା ଶକ୍ତି ପାଇଁ ବାୟୁ ଅଙ୍ଗ ଭାବେ ଭାରତୀୟ ବାୟୁସେନା 88 ବର୍ଷ ଧରି ନିରବଚ୍ଛିନ୍ନ ସେବା ଯୋଗାଇ ଆସୁଛି । ଅନେକ ସମୟରେ ଏହା ବିବାଦ ସମୟରେ ବାୟୁ ଯୁଦ୍ଧ ମଧ୍ୟ କରିଥିବାର ନଜିର ରହିଛି ।
• ଅପରେସନ ମେଘଦୂତ, ଅପରେସନ କାକ୍ଟସ, ଅପରେସନ ବିଜୟ ଓ ଅପରେସନ ପୁମଲାଇ ଆଦି ଗୁରୁତ୍ବପୂର୍ଣ୍ଣ ଅପରେସନରେ ଭାରତୀୟ ବାୟୁସେନା ନିଜ ସାମର୍ଥ୍ୟର ପ୍ରତିପାଦନ କରିଛି ।
• ଜାତିସଂଘ ଶାନ୍ତି ମିଶନରେ ମଧ୍ୟ ଭାରତୀୟ ବାୟୁସେନା ସାମିଲ ରହିଛି ।
• ଚୀନ ଓ ପାକିସ୍ତାନ ସହ ଭାରତର ବିବାଦ ନେଇ ଭାରତୀୟ ବାୟୁସେନା ଏକ ଗୁରୁତ୍ବପୂର୍ଣ୍ଣ ଭୂମିକା ବହନ କରିବା ସହ ଭାରତର ଶକ୍ତି ପ୍ରଦର୍ଶନରେ ସାହାଯ୍ୟ କରିଛି ।
• ନିକଟରେ ଭାରତୀୟ ବାୟୁସେନାକୁ ଅଧିକ ଶକ୍ତିଶାଳୀ କରିଗବା ପାଇଁ ସାମିଲ ହୋଇଛି 4ଟି ଶକ୍ତିଶାଳୀ ରାଫେଲ ଯୁଦ୍ଧ ବିମାନ ।
• ଦେଶର ରାଷ୍ଟ୍ରପତି ଭାରତୀୟ ବାୟୁସେନାର ସୁପ୍ରିମ କମାଣ୍ଡର ରାଙ୍କ ବହନ କରନ୍ତି ।
• ବର୍ତ୍ତମାନ ଏୟାର ଫୋର୍ସରେ କେବଳ ଜଣେ ପଞ୍ଚ ତାରକା ପ୍ରାପ୍ତ ଅଧିକାରୀ ରହିଛନ୍ତି । ସେ ହେଉଛନ୍ତି ଏୟାର ଫୋର୍ସ ମାର୍ଶାଲ ଅର୍ଜନ ସିଂ ।
• ଏୟାର ଫୋର୍ସରେ ବର୍ତ୍ତମାନ ପ୍ରାୟ 1 ଲକ୍ଷ 39 ହଜାର 576 ଜଣ ସକ୍ରିୟ କର୍ମଚାରୀ ରହିଛନ୍ତି । ଏହାଛଡା 1 ଲକ୍ଷ 40 ହଜାର ସଂରକ୍ଷିତ ଅଧିକାରୀ ମଧ୍ୟ ରହିଛନ୍ତି ।
• ଭାରତୀୟ ବାୟୁସେନାର ପ୍ରଥମ ଭାରତୀୟ ସିଏଏସ ଭାବେ ଦାୟିତ୍ବ ବହନ କରିଛନ୍ତି ସୁବ୍ରୋତୋ ମୁଖାର୍ଜୀ ।