ନୂଆଦିଲ୍ଲୀ: ଆଜି କାରଗିଲ ବିଜୟ ଦିବସ । କାରଗିଲ ଯୁଦ୍ଧରେ ଶହୀଦ ହୋଇଥିବା ବୀର ଯବାନଙ୍କୁ ଶ୍ରଦ୍ଧାଞ୍ଜଳୀ ଦେବାକୁ ଏହା ଏକ ସ୍ମରଣୀୟ ଦିନ । ଠିକ୍ 20 ବର୍ଷ ତଳେ ଆଜିର ଦିନରେ କାରଗିଲରେ ଫରଫର ହୋଇ ଉଡିଥିଲା ତ୍ରିରଙ୍ଗା । ପଛପଟୁ ଛୁରାମାଡ କରୁଥିବା ପାକିସ୍ତାନକୁ କଡା ଜବାବ ଦେବାରେ ସଫଳ ହୋଇଥିଲା ଭାରତୀୟ ସେନା । ମନେ ପଡୁଛି ଆମ ଯବାନଙ୍କ ତ୍ୟାଗ, ବୀରତ୍ବ ଓ ସାହାସିକତାର ନିଦର୍ଶନ ।
କାରଗିଲ ଯୁଦ୍ଧ ୧୯୯୯ ମେ' ୩ରୁ ଆରମ୍ଭ ହୋଇ ଜୁଲାଇ ୨୬ରେ ଶେଷ ହୋଇଥିଲା । ପାଖାପାଖି 2 ମାସ ପର୍ଯ୍ୟନ୍ତ ଚାଲିଥିବା ଏହି ଯୁଦ୍ଧ କଥା ଆଜି ବି ଭାରତୀୟଙ୍କ ଭିତରେ ସ୍ମରଣୀୟ ହୋଇ ରହିଛି । ଯୋଜନାବଦ୍ଧ ଭାବେ ପାକିସ୍ତାନ ୧୯୯୮ରୁ ହିଁ ଯୁଦ୍ଧର ଆରମ୍ଭ କରିଥିଲା । ୫ ହଜାର ସୈନ୍ୟଙ୍କୁ କାର୍ଗିଲ ଦଖଲ ପାଇଁ ପଠାଇଥିଲା ପାକିସ୍ତାନ । ଭାରତୀୟ ସେନା ଏହା ଜାଣିବା ପରେ ଆରମ୍ଭ ହୋଇଥିଲା ଅପରେସନ ବିଜୟ । ୬୦ ଦିନର ଯୁଦ୍ଧ ପରେ ବିଜୟୀ ହୋଇଥିଲା ଭାରତ ।