ବେଙ୍ଗାଲୁରୁ: କର୍ଣ୍ଣାଟକ ରାଜ୍ୟ ସଡକ ପରିବହନ ନିଗମ ବସ୍ ଡିପୋରେ ଶନିବାର ଦିନ ମଜୁରିଆ, ଛାତ୍ର ଓ ବୃତ୍ତିଗତଙ୍କ ସମେତ ଶହ ଶହ ଲୋକ ଏକତ୍ରିତ ହୋଇଛନ୍ତି । ଆନ୍ତଃ ଜିଲ୍ଲା ପରିବହନ ପାଇଁ ସରକାରଙ୍କ ଘୋଷଣା ପରେ ଲୋକମାନେ ଡିପୋକୁ ବହୁ ସଂଖ୍ୟାରେ ଆସି ଜମା ହୋଇଥିଲେ ।
ଏହାର ସୁଯୋଗ ନେଇ ବସ୍ ମାଲିକମାନେ ଅଧିକ ଭଡା ନେଇଥିଲେ । ରାଜ୍ୟର ଉତ୍ତର ଜିଲ୍ଲା ଯିବା ପାଇଁ ଜଣ ପିଛା 1000ରୁ ଅଧିକ ଭଡା ନେଇଥିଲେ । ପରେ ମୁଖ୍ୟମନ୍ତ୍ରୀ ବିଏସ୍ ୟେଦିୟୁରପ୍ପା ନିର୍ଦ୍ଦେଶ ଦେଇଛନ୍ତି ଯେ, ସେମାନଙ୍କଠାରୁ କେବଳ ଏକକ ଭଡା ସଂଗ୍ରହ କରାଯାଉ।
ପ୍ରଥମେ କୁହାଯାଇଥିଲା ଯେ, ବସରେ ପ୍ରବାସୀ ଶ୍ରମିକଙ୍କୁ ପରିବହନ କରାଯିବ ଓ ସରକାର ଏହାର ଖର୍ଚ୍ଚ ବହନ କରିବେ। କିଛି ଛାତ୍ର ମଧ୍ୟ ଟିକେଟ ପାଇଁ ଡିପୋରେ ପହଞ୍ଚିଥିଲେ । ଅନ୍ୟପକ୍ଷେ ଯାତ୍ରୀମାନଙ୍କୁ ବସରେ ଯିବାକୁ ଅନୁମତି ଦିଆଯିବା ପୂର୍ବରୁ ଥର୍ମାଲ ସ୍କ୍ରିନିଂ କରାଯିବ ଓ ଅନ୍ୟ ଜିଲ୍ଲାକୁ ଯାଉଥିବା ବ୍ୟକ୍ତି ଅନୁଷ୍ଠାନିକ କ୍ବାରେଣ୍ଟାଇନରେ ରହିବା ଆବଶ୍ୟକ ବୋଲି ସରକାର କହିଛନ୍ତି।
ପ୍ରାଥମିକ ଓ ମାଧ୍ୟମିକ ଶିକ୍ଷା ମନ୍ତ୍ରୀ ସୁରେଶ କୁମାର କହିଛନ୍ତି, ପ୍ରଥମେ ଗୋଟିଏ ବସରେ 30ଜଣ ଯାଇଥାନ୍ତେ ଓ ସେମାନେ ନିଜ ନିଜ ଭିତରେ ଗାଡି ଭଡା ଦେଇଥାନ୍ତେ ମାତ୍ର ବର୍ତ୍ତମାନ ସମସ୍ତଙ୍କ ଏକକ ଭଡା ଦେବାକୁ ପଡିବ ଓ ବାକି ଖର୍ଚ୍ଚ ଶ୍ରମ ବିଭାଗ ବହନ କରିବ ।
ରାଜ୍ୟର ବିଭିନ୍ନ ପ୍ରାନ୍ତରୁ ବେଙ୍ଗାଲୁରୁ ସହରରେ ପ୍ରାୟ 5,344 ପ୍ରବାସୀ ଶ୍ରମିକ ଅଛନ୍ତି। ଯେଉଁମାନେ ରାଜ୍ୟ ବାହାରକୁ ଯିବାକୁ ଚାହୁଁଛନ୍ତି କିମ୍ବା ରାଜ୍ୟ ଭିତରକୁ ଆସିବାକୁ ଚାହୁଁଛନ୍ତି ସେମାନଙ୍କ ପାଇଁ ସରକାର ଏହି ପ୍ରକ୍ରିୟାକୁ ସରଳ କରିବାକୁ ଚେଷ୍ଟା କରୁଛନ୍ତି।