ଚାଉଳ ବୋଝେଇ ଟ୍ରକକୁ ପିଟିଲା ଅଟୋ, 4 ମୃତ

ତେଲେଙ୍ଗାନା ମେହେବୁନଗର ଜିଲ୍ଲାର ଜଡଚେରଲା ନିକଟରେ ସଡକ ଦୁର୍ଘଟଣା। ଏକ ଚାଉଳ ବୋଝେଇ ଟ୍ରକ ସହ ଅଟୋରିକ୍ସା ଧକ୍କା ହେବା ଫଳରେ 4ଜଣଙ୍କ ମୃତ୍ୟୁ ଘଟିଛି।

ହାଇଦ୍ରାବାଦ: ତେଲେଙ୍ଗାନାରେ ଏକ ଚାଉଳ ବୋଝେଇ ଟ୍ରକ ସହ, ଅନ୍ୟ ଏକ ଅଟୋରିକ୍ସା ଧକ୍କା ହେବା ଫଳରେ 4ଜଣଙ୍କ ମୃତ୍ୟୁ ଘଟିଛି । ସମସ୍ତ ମୃତକ ଗୋଟିଏ ପରିବାରର ସଦସ୍ୟ ବୋଲି ଜଣାପଡିଛି । ରାଜ୍ୟର ମେହେବୁନଗର ଜିଲ୍ଲା, ଜଡଚେରଲା ନିକଟରେ ଏଭଳି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ।

ଦୁର୍ଘଟଣାର ଶିକାର ହୋଇଥିବା ନରେଶ ନାମକ ବ୍ୟକ୍ତି, ଅଟୋରେ ନିଜ ଘରକୁ ଯାଉଥିଲେ । ସାଙ୍ଗରେ ଥିଲେ ତାଙ୍କ ଭଉଣୀ, ଭିଣେଇ ଏବଂ ସେମାନଙ୍କର ପିଲା । ବାଟରେ ଯିବା ବେଳେ ଏକ ଚାଉଳ ବୋଝେଇ ଟ୍ରକକୁ ଧକ୍କା ଦେଇଥିଲା ଅଟୋ । ଫଳରେ ନରେଶ ଏବଂ ତାଙ୍କ ଭଉଣୀ, ଭିଣେଇ, ଗୋଟିଏ ପିଲାର ଘଟଣାସ୍ଥଳରେ ମୃତ୍ୟୁ ଘଟିଛି । ହାୟତୀ ନାମକ 5 ବର୍ଷର ଝିଅକୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି । ସେପଟେ ପୋଲିସ ଘଟଣା ସମ୍ପର୍କରେ ଖବର ପାଇବା ପରେ ଏହାର ତଦନ୍ତ ଜାରି ରଖିଛି ।