ନୂଆଦିଲ୍ଲୀ: ଥଣ୍ଡା ଆଉ କୁହୁଡିରେ ଲତପତ ସମଗ୍ର ଉତ୍ତର ଭାରତବାସୀ । କିଛି ଦିନ ଆଶିଂକ ଆରାମ ପରେ ପୁଣି ହାଡଭଙ୍ଗା ଶୀତ ଅନୁଭୂତ ହୋଇଛି । ପାହାଡିଆ ଅଞ୍ଚଳରେ ପ୍ରବଳ ମାତ୍ରାରେ ବରଫପାତ ଯୋଗୁଁ ଆସନ୍ତା 2 ଦିନ ତାପମାତ୍ରାରେ ହ୍ରାସ ଦେଖାଯିବାର ଅନୁମାନ କରିଛି ପାଣିପାଗ ବିଭାଗ ।
ପଶ୍ଚିମରେ ପାଣିପାଗରେ ପରିବର୍ତ୍ତନ ଯୋଗୁଁ ଉତ୍ତରଭାରତରେ ହାଡଭଙ୍ଗା ଶୀତ ଅନୁଭୂତ ହେଉଛି । ଏନେଇ ମଙ୍ଗଳବାର ଦିଲ୍ଲୀରେ ହାଲୁକା ବର୍ଷା ହେବାର ସମ୍ଭାବନା ରହିଛି । ମଙ୍ଗଳବାର ସକାଳୁ ଦିଲ୍ଲୀର ତାପମାତ୍ରା 13 ଡିଗ୍ରୀ ସେଲସିୟସ ରେକର୍ଡ କରାଯାଇଛି । ଏହାସହ 20 ରୁ 25 କିମି ବେଗରେ ପବନ ବୋହିବାର ସମ୍ଭାବନା ରହିଛି ।
ତେବେ ଅତ୍ୟଧିକ ଥଣ୍ଡା ଓ କୁହୁଡି ପାଇଁ ରେଳ ଚଳାଚଳ ବାଧାପ୍ରାପ୍ତ ହୋଇଛି । ସେ ନେଇ ମଙ୍ଗଳବାର 15ରୁ ଊର୍ଦ୍ଧ୍ବ ଟ୍ରେନ 1 ଘଣ୍ଟା ବିଳମ୍ବରେ ଚାଲୁଛି । ଏଥିରେ ରାଜଧାନୀ ଓ ଦୁରନ୍ତ ଭଳି ଏକ୍ସପ୍ରେସ ମଧ୍ୟ ସାମିଲ ରହିଛି । ସେହିଭଳି ଚଣ୍ଡିଗଡ-କୋଚୁବେଟ୍ଟୀ ସମ୍ପର୍କକ୍ରାନ୍ତି ଏକ୍ସପ୍ରେସ 7 ଘଣ୍ଟା ବିଳମ୍ବରେ ଚାଲୁଛି । ଏହି ପ୍ରରିପେକ୍ଷୀରେ ରେଳ ଯାତ୍ରୀଙ୍କୁ ପରାମର୍ଶ ଦିଆଯାଇଛି ଯେ, ସେ ଯାତ୍ରା ପାଇଁ ଘରୁ ବାହାରିବା ପୂର୍ବରୁ ନିଜ ଗାଡିର ସମୟ ଦେଖି ବାହାରିବେ ।