ଗାନ୍ଧୀନଗର: ଗୁଜୁରାଟ ସୁରଟରେ ଏକ ତିନି ମହଲା ଘରୋଇ ଡାକ୍ତରଖାନାରେ ଭୟାବହ ଅଗ୍ନିକାଣ୍ଡ ହୋଇଥିବା ଦେଖିବାକୁ ମିଳିଛି। ଘଟଣାସ୍ଥଳରେ ଦମକଳ ବାହିନୀର 10 ଗାଡ଼ି ନିଆଁ ଲିଭାଇବା କାର୍ଯ୍ୟରେ ନିୟୋଜିତ ହୋଇଛନ୍ତି । ଯୁଦ୍ଧକାଳୀନ ପରିସ୍ଥିତିରେ ଡାକ୍ତରଖାନାରେ ଥିବା 50ରୁ ଅଧିକ ରୋଗୀଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଥିବା ପ୍ରଶାସନ ସୂଚନା ଦେଇଛି । ଡାକ୍ତରଖାନାରେ ଥିବା ସମସ୍ତ ରୋଗୀଙ୍କୁ ସୁରକ୍ଷିତ ଭାବରେ ଅନ୍ୟତ୍ର ସ୍ଥାନାନ୍ତର କରାଯାଇଥିଲା ।
ଅଥ୍ବଲାଇନ୍ସରେ ଥିବା ଏହି ଡାକ୍ତରଖାନାରେ ସର୍ଟସର୍କିଟ ଯୋଗୁଁ ଏହି ଅଗ୍ନିକାଣ୍ଡ ହୋଇଥିବା ସୂଚନା ମିଳିଛି । ଅଗ୍ନିକାଣ୍ଡ ସମୟରେ ଡାକ୍ତରଖାନାରେ 16 ଜଣ ରୋଗୀ ଆଇସିୟୁରେ ରହିଥିଲେ। ଏହାସହ 50ରୁ ଅଧିକ ରୋଗୀ ଡାକ୍ତରଖାନାରେ ଶଯ୍ୟାସାୟୀ ହୋଇ ରହିଥିଲେ । ସେମାନଙ୍କ ମଧ୍ୟରୁ କେତେକ ରୋଗୀଙ୍କୁ ଭେଣ୍ଟିଲେଟର ରଖା ଯାଇଥିଲା। ଡାକ୍ତରଖାନାରେ ଅଗ୍ନିକାଣ୍ଡ ହେବା କ୍ଷଣି ଦମକଳ ବାହିନୀକୁ ସୂଚନା ଦିଆଯାଇଥିଲା। ଯଥାଶୀଘ୍ର ଅଗ୍ନିଶମ ବାହିନୀ ପହଞ୍ଚି ଡାକ୍ତରଖାନାରେ ରୋଗୀ ଏବଂ କର୍ମଚାରୀଙ୍କୁ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ତେବେ ଧୂଆଁ ଯୋଗୁଁ ଅଗ୍ନିଶମ ବାହିନୀକୁ ଉଦ୍ଧାର କାର୍ଯ୍ୟ କରିବାରେ ନାନା ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା। ତେବେ ଶେଷରେ ସମସ୍ତ କର୍ମଚାରୀ ଓ ରୋଗୀ ସୁରକ୍ଷିତ ଭାବେ ଉଦ୍ଧାର ହୋଇଥିଲେ।