ନୂଆଦିଲ୍ଲୀ: ଗତ ଗୁରୁବାର ପାର୍ଲାମେଣ୍ଟର ଅଧିବେଶନ ଚାଲିଥିବା ସମୟରେ ଗୃହରେ ଅଧ୍ୟକ୍ଷତା କରୁଥିଲେ ବିଜେପି ସାଂସଦ ରମା ଦେବୀ । ଗୃହରେ ଚାଲିଥିଲା ଟ୍ରିପଲ ତଲାକକୁ ନେଇ ବିତର୍କ । ଏତିକି ବେଳେ ସମାଜ ବାଦୀ ପାର୍ଟି ସାଂସଦ ଆଜମ ଖାନଙ୍କୁ ଗୃହରେ କହିବାକୁ ଡାକିଥିଲେ କାମଚଳା ଅଧ୍ୟକ୍ଷା ରମାଦେବୀ । ଆଜମ ରମା ଦେବୀଙ୍କୁ ଅଶୋଭନୀୟ ମନ୍ତବ୍ୟ ଦେଇଥିଲେ ଯାହାକୁ ନେଇ ଏବେ ଜାତୀୟ ରାଜନୀତି ସରଗରମ ହୋଇପଡିଛି ।
ଆଇନ ମନ୍ତ୍ରୀ ରବି ଶଙ୍କର ପ୍ରସାଦ ସିଧା ଆଜମଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଏହାସହ ଦଳମତ ନିର୍ବିଶେଷରେ ସମସ୍ତ ଏହାକୁ ନିନ୍ଦା କରିବା ସହ ଆଜମଙ୍କୁ କ୍ଷମା ମାଗିବା ପାଇଁ ଦାବି କରିଛନ୍ତି । ତେବେ ଆଜମ କ୍ଷମା ମାଗିବେ ନାହିଁ ବୋଲି କହିବା ପରେ ଏହାକୁ ନେଇ ସର୍ବଦଳୀୟ ବୈଠକ ଡକାଯାଇଥିଲା । ସମସ୍ତ ଦଳ ଏହା ଉପରେ ବାଚସ୍ପତିଙ୍କୁ ଚୂଡାନ୍ତ ନିଷ୍ପତି ନେବାର ଅଧିକାର ଦେଇଛନ୍ତି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଲା ଆଜମଙ୍କ ମନ୍ତବ୍ୟକୁ ସମସ୍ତ ମହିଳା ସାଂସଦ ଦୃଢ ଭାବେ ନିନ୍ଦା କରିବା ସହ ରମା ଦେବୀଙ୍କ ସପକ୍ଷରେ ବାହାରିଛନ୍ତି । ଯାହା ଆଜମଙ୍କ ପାଇଁ ଅଡୁଆ ବଢିବାରେ ଲାଗିଛି ।