ନୂଆଦିଲ୍ଲୀ: ସାରା ଦେଶ କୋରୋନାକୁ କାବୁ କରିବା ପାଇଁ ଏବେ ପ୍ରତିଶୃତି ବଦ୍ଧ । ଯେକୌଣସି ମତେ କୋରୋନା ବିରୋଧରେ ବିଜୟ ପାଇଁ ପୁରା ହିନ୍ଦୁସ୍ତାନ ଏକାଠି । ସାରାଦେଶରେ କେଉଁଠି ଲକଡାଉନ ତ କେଉଁଠି କର୍ଫ୍ୟୁ । ଯାହା ଦେଶକୁ ମଣିଷ ସମାଜକୁ ବଞ୍ଚାଇ ପାଇଁ ଏହା ଆବଶ୍ୟକ ମଧ୍ୟ । ଏହିସବୁ ମଧ୍ୟରେ ବର୍ତ୍ତମାନ ଏବେ ଏକ ଚିନ୍ତାଜନକ ସ୍ଥିତି ଦେଶରେ ଉତ୍ପନ୍ନ ହୋଇଛି । ଏହି ସ୍ଥିତି ହେଉଛି ଦେଶରେ ଥିବା ନିର୍ମାଣ ଶ୍ରମିକଙ୍କ ସ୍ଥିତି । ଯେଉଁମାନେ ପ୍ରତିଦିନ ମୂଳଲାଗି ପରିବାର ପ୍ରତିପୋଷଣ କରୁଥିଲେ । ହେଲେ କଓରୋନା ପାଇଁ ସମସ୍ତ ନିର୍ମାଣ କାମ ବନ୍ଦ ହୋଇଯିବା ପରେ ଏବେ ଏମାନଙ୍କର ସ୍ଥିତି ଦୟନୀୟ ହୋଇଯାଇଛି ।
ଏପରି ସ୍ଥଳେ ଦିଲ୍ଲୀରେ ଥିବା ନିର୍ମାଣ ଶ୍ରମିକଙ୍କ ପାଇଁ ପ୍ୟାକେଜ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ସୋମବାର ସଂଧ୍ଯାରେ ଏକ ସାମ୍ବାଦିକ ସମ୍ମିଳନୀ କରି କେଜ୍ରିୱାଲ କହିଛନ୍ତି ଦିଲ୍ଲୀରେ ବର୍ତ୍ତମାନ ସୁଦ୍ଧା 30 ଜଣ କୋରୋନା ଆକ୍ରାନ୍ତଙ୍କ ଚିକିତ୍ସା ଚାଲିଛି । ବିଗତ 24 ଘଣ୍ଟା ମଧ୍ୟରେ କୌଣସି ନୂତନ ରୋଗୀ ଚିହ୍ନଟ ହୋଇନାହାଁନ୍ତି । ତଥାପି ସରକାର ପ୍ରସ୍ତୁତିରେ କୌଣସି ଅବହେଳା କରିବାକୁ ଚାହୁଁନାହାଁନ୍ତି । କୋରୋନା ତୃତୀୟ ପର୍ଯ୍ୟାୟ କେମିତି ପ୍ରବେଶ କରିପାରିବ ନାହିଁ ସେଥିପାଇଁ ଦିଲ୍ଲୀ ସରକାର ସମସ୍ତ ପଦକ୍ଷେପ ନେଉଛନ୍ତି । ଏଥିପାଇଁ ଏକ ବିଶେଷଜ୍ଞ କମିଟି ଗଠନ କରିଛନ୍ତି । କମିଟି 24 ଘଣ୍ଟା ଭିତରେ ରିପୋର୍ଟ ଦେବାପରେ ସରକାର ଆବଶ୍ୟକ ପଦକ୍ଷେପ ନେବେ ।