ଭୋପାଳ: ଦେଶର ୮ ରାଜ୍ୟର ୧୯ଟି ରାଜ୍ୟସଭା ଆସନ ଲାଗି ଶୁକ୍ରବାର ମତଦାନ ଜାରି ରହିଛି। ମଧ୍ୟପ୍ରଦେଶରେ ମଧ୍ୟ ୩ଟି ଆସନ ପାଇଁ ମତଦାନ ହେଉଛି। ତେବେ ଇତି ମଧ୍ୟରେ ମଧ୍ୟ ପ୍ରଦେଶରୁ ଏକ ଦୃଶ୍ୟ ସାମ୍ନାକୁ ଆସିଛି ଯାହା ଏବେ ଚର୍ଚ୍ଚାର ବିଷୟ ପାଲଟିଛି । ଏଠାରେ କୋରୋନା ଭାଇରସର ପ୍ରକୋପ ମଧ୍ୟ ଜଣେ ବିଧାୟକଙ୍କୁ ମତଦାନ କରିବାରୁ ରୋକି ପାରିନାହିଁ । ସେ ପିପିଇ କିଟ୍ ପିନ୍ଧି ଭୋପାଳ ସ୍ଥିତ ବିଧାନସଭାରେ ମଦତାନ ପାଇଁ ପହଞ୍ଚିଛନ୍ତି ।
ସୂଚନା ମୁତାବକ, କଂଗ୍ରେସ ବିଧାୟକ କୁଣାଳ ଚୌଧୁରୀ କୋରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି । ତେବେ ଦିନ ୧ଟା ସମୟରେ କଂଗ୍ରେସ ବିଧାୟକ କୁଣାଲ ଚୌଧୁରୀ ପିପିଇ କିଟ୍ ପିନ୍ଧି ମତଦାନ କରିବାକୁ ବିଧାନସଭା ଭବନରେ ପହଞ୍ଚିଥିଲେ। ପ୍ରାୟ 205 ବିଧାୟକ ମତଦାନ କରିସାରିବା ପରେ ଶେଷରେ ସେ ମତଦାନ କରିଥିଲେ । ସେ ସଦନକୁ ପିପିଇ କିଟ୍ ପିନ୍ଧି ଆସିଥିଲେ । ତାଙ୍କ ହାତରେ କେବଳ ମୋବାଇଲ ଫୋନ ଥିଲା । ତେବେ ସଦନରେ ପହଞ୍ଚି ସେ ମତଦାନ କରିବା ସମୟରେ ସେଠାରେ ଉପସ୍ଥିତ ଅନ୍ୟାନ୍ୟ ଲୋକ ତାଙ୍କଠାରୁ ସାମାଜିକ ଦୂରତ୍ବ ଅବଲମ୍ବନ କରିଥିଲେ ।