ନୂଆଦିଲ୍ଲୀ : ଦିଲ୍ଲୀରେ 12 ବର୍ଷିୟା ନାବାଳିକା ସହ ହୋଇଥିବା ଦୁଷ୍କର୍ମ ଘଟଣାରେ ରାଜନୀତି ଜୋର ଧରିଛି । ପୀଡିତାଙ୍କ ସ୍ବାସ୍ଥ୍ୟ ଅବସ୍ଥା ବୁଝିବା ପାଇଁ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି ଏମ୍ସ ପହଞ୍ଚିଥିଲେ । ଏହି ସମୟରେ କଂଗ୍ରେସ କେଜ୍ରିୱାଲଙ୍କୁ ତୀବ୍ର ବିରୋଧ କରିଛି । କଂଗ୍ରେସ କର୍ମୀ ମୁଖ୍ୟମନ୍ତ୍ରୀଙ୍କୁ କଳା ପତାକା ମଧ୍ୟ ଦେଖାଇଛନ୍ତି ।
ମୁଖ୍ୟମନ୍ତ୍ରୀ କେଜ୍ରିୱାଲ ଗୁରୁବାର ଏମ୍ସ ପହଞ୍ଚି ପୀଡିତାଙ୍କ ପରିବାରକୁ ଭେଟିଥିଲେ । ଯେଉଁଠି ପୀଡିତା ଚିକିତ୍ସାଧୀନ ଅଛନ୍ତି । ମୁଖ୍ୟମନ୍ତ୍ରୀ ପୀଡିତାଙ୍କ ହାଲଚାଲ ବୁଝିବା ସହ ତାଙ୍କ ପରିବାର ପାଇଁ ସହାୟତା ମଧ୍ୟ ଘୋଷଣା କରିଛନ୍ତି ।
ତେବେ ମୁଖ୍ୟମନ୍ତ୍ରୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ପୂର୍ବରୁ ଦିଲ୍ଲୀ କଂଗ୍ରେସ ସଭାପତି ଅନିଲ ଚୌଧୁରୀ ପୀଡିତାଙ୍କ ଅବସ୍ଥା ଜାଣିବା ପାଇଁ ଏମ୍ସ ପହଞ୍ଚିଥିଲେ। ପୀଡିତାଙ୍କ ପିତାଙ୍କୁ ଭେଟିବା ପରେ ଅନିଲ ଚୌଧୁରୀ ଗଣମାଧ୍ୟମକୁ ସମ୍ବୋଧିତ କରୁଥିଲେ । ଏହି ସମୟରେ ଅରବିନ୍ଦ କେଜ୍ରିୱାଲଙ୍କ କାର ଏମ୍ସ କ୍ୟାମ୍ପସରେ ପ୍ରବେଶ କରିଥିଲା ଏବଂ କଂଗ୍ରେସ କର୍ମୀମାନେ ମୁଖ୍ୟମନ୍ତ୍ରୀଙ୍କୁ ବିରୋଧ କରିବା ଆରମ୍ଭ କରିଥିଲେ। କଂଗ୍ରେସ କର୍ମୀମାନେ ବ୍ୟାରିକେଡକୁ ଡେଇଁପଡି ମୁଖ୍ୟମନ୍ତ୍ରୀଙ୍କୁ ବିରୋଧ କରିଥିଲେ ଏବଂ ସ୍ଲୋଗାନ ଦେବା ଆରମ୍ଭ କରିଥିଲେ।
ମହିଳାଙ୍କ ପାଇଁ ଦିଲ୍ଲୀ ସୁରକ୍ଷିତ ସ୍ଥାନ ନୁହେଁ ବୋଲି ସେମାନେ କହିଛନ୍ତି । ଅରବିନ୍ଦ କେଜ୍ରିୱାଲ ମହିଳାଙ୍କ ସୁରକ୍ଷା ପ୍ରତିଜ୍ଞା କରି କ୍ଷମତାକୁ ଆସିଛନ୍ତି, କିନ୍ତୁ ଆଜି ଛୋଟ ଶିଶୁମଧ୍ୟ ଦିଲ୍ଲୀରେ ସୁରକ୍ଷିତ ନୁହଁନ୍ତି ବୋଲି କଂଗ୍ରେସ ପକ୍ଷରୁ କୁହାଯାଇଛି ।
