ନୂଆଦିଲ୍ଲୀ: ମହାରାଷ୍ଟ୍ରରେ ଚାଲିଛି ମହାନାଟକ। ଏହି ନାଟକରେ ଭରିରହିଛି ଫୁଲ୍ ସସପେନ୍ସ।ଏହା ବର୍ତ୍ତମାନ ଦେଶର ରାଜନୀତି କ୍ଷେତ୍ରରେ ଏକ ରୋଚକ ଓ ରୋମାଞ୍ଚକ ପରିସ୍ଥିତି ସୃଷ୍ଟି କରିଛି। ଗୋଟିଏ ପଟେ ନାଟକର ବିଷୟବସ୍ତୁ ଲେଖା ସରି ନାୟକ ସ୍ଥିର ସାରିଥିବା ବେଳେ ରାତିଭିତରେ ବଦଳିଯାଉଛି ସବୁକିଛି।ପଲିଟିକ୍ସ,ପାୱାର,ପୋଜିସନ ଓ ପୈସା ପାଇଁ ମୁଖିଆଙ୍କଠୁ ଆରମ୍ଭ କରି ବିଧାୟକ ଗୋଟିଏ ଦଳରୁ ଅନ୍ୟ ଦଳକୁ ଲମ୍ପ ମାରୁଛନ୍ତି। ଏପଟେ ଏନସିପିର କିଛି ବିଧାୟକ ନିଖୋଜ ହେବାର ସଦ୍ୟତମ ଖବର ସାମ୍ନାକୁ ଆସିଛି।
ତେବେ ବର୍ତ୍ତମାନ ପରିସ୍ଥିତିରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଭାବେ ଦେବେନ୍ଦ୍ର ଫଡନାଭିସ ଶପଥ ନେଇସାରିଛନ୍ତି। ଆଉ ବିଜେପିକୁ ସମର୍ଥନ ଦେଇଥିବା ଏନସିପି ଦୁଇଫାଳ ହୋଇସାରିଛି। ମଝିଦରିଆରେ ରହିଯାଇଛି ଶିବସେନା। ଏଭଳି ଏକ ଘଡିସନ୍ଧି ମୂହୁର୍ତ୍ତରେ ଶିବସେନାର ସଞ୍ଜୟ ରାଉତ ନବନିର୍ବାଚିତ ମୁଖ୍ୟମନ୍ତ୍ରୀ ଫଡନାଭିସଙ୍କୁ ଟାର୍ଗେଟ କରିଛନ୍ତି। ଫଡନାଭିସଙ୍କ ଏହି ଶପଥ ଗ୍ରହଣ ଆକ୍ସିଡେଣ୍ଟାଲ ବୋଲି ଟ୍ବିଟ କରିଛନ୍ତି ଶିବସେନାର ଏହି ବରିଷ୍ଠ ନେତା।