ନୂଆଦିଲ୍ଲୀ: ପୁଲୱାମା ଆତ୍ମଘାତୀ ଆକ୍ରମଣକୁ ନେଇ ଆରମ୍ଭ ହେଲା ରାଜନୀତି । ଆକ୍ରମଣକୁ ନେଇ କଂଗ୍ରେସ ପିଏମ ନରେନ୍ଦ୍ର ମୋଦିଙ୍କୁ କରିଛନ୍ତି ଟାର୍ଗେଟ । ଏହାସହ ମୋଦି ସରକାରଙ୍କୁ ୫ଟି ପ୍ରଶ୍ନ କରିଛି କଂଗ୍ରେସ । କଂଗ୍ରେସ ପ୍ରବକ୍ତା ରନ୍ଦୀପ ସିଂ ସୁର୍ଜେୱାଲା କହିଛନ୍ତି ଯେ ଅପରାହ୍ନ ୩.୧୫ ମିନିଟରେ ଆକ୍ରମଣର ଖବର ଆସିଯାଇଥିଲା । ୫.୧୫ ମିନିଟରେ କଂଗ୍ରେସ ଏହା ଉପରେ ପ୍ରତିକ୍ରିୟା ଦେଇଥିଲା । ମାତ୍ର ପ୍ରଧାନମନ୍ତ୍ରୀ ମୋଦି କଣ କରୁଥିଲେ ବୋଲି ସେ ପ୍ରଶ୍ନ କରିଛନ୍ତି ।
କଂଗ୍ରେସ ପ୍ରବକ୍ତା କହିଛନ୍ତି ଯେ ପୁଲୱାମା ଆକ୍ରମଣ ଦିନରେ ପିଏମ ମୋଦି ଦିନସାରା ପାର୍କ ପରିଭ୍ରମଣ ଓ ନୌକା ବିହାର କରୁଥିଲେ । ଏହାସହ ସେ ସନ୍ଧ୍ୟା ୬.୪୫ ମିନିଟ ଯାଏ ଫିଲ୍ମ ସୁଟିଂ କରାଉଥିଲେ । ପରେ ସେ ଧନଗଢ ଗେଟ ପହଞ୍ଚି ଅଧିକାରୀଙ୍କ ସହ ଆଲୋଚନା କରିଥିଲେ । ସେଠାରେ ସ୍ଥାନୀୟ ଲୋକ ମୋଦି ଜିନ୍ଦାବାଦ ନାରା ଦେଉଥିଲେ । ପିଏମ ମଧ୍ୟ ସେମାନଙ୍କ ଅଭିବାଦନକୁ ସ୍ବୀକାର କରିଥିଲେ । ଦେଶ ଆମ ଶହୀଦଙ୍କ ଶରୀରର ଖଣ୍ଡ ବିଖଣ୍ଡକୁ ଗଣୁଥିଲେ । ମାତ୍ର ପିଏମ ନିଜ ନାରା ଲଗାଇବାରେ ବ୍ୟସ୍ତ ଥିଲେ । ସାର ଦେଶର ରୋଷେଇ ଶାଳା ବନ୍ଦ ଥିଲା । ସେହି ସମୟରେ ପିଏମ ଚା' ଓ ଟିଫିନ ଆନନ୍ଦ ଉଠାଉଥିଲେ । ଏହା ହେଉଛି ପିଏମଙ୍କ ପ୍ରକୃତ ଚେହେରା । ଏହାଠାରୁ ଲଜ୍ଜାଜନକ ବ୍ୟବହାର କୌଣସି ପିଏମ କରି ନଥିବେ ବୋଲି ସେ କହିଛନ୍ତି ।