ନୂଆଦିଲ୍ଲୀ: ରାଜନୀତିରେ ନ ମାତି କାମ କର । ଲୋକଙ୍କ ସମସ୍ୟା ଉପରେ ସ୍ଥାନୀୟ ଅଧିକାରୀଙ୍କ ସହ ଆଲୋଚନା କର । ବାହାର କର ସମାଧାନର ବାଟ । ଅଧିବେଶନ ସମୟରେ ସଂସଦରେ ଉପସ୍ଥିତ ରହିବାକୁ ଯେମିତି ନ ଭୁଲ । ବିଜେପି ସଂସଦୀୟ ଦଳ ବୈଠକରେ ସାଂସଦଙ୍କୁ ଏମିତି କିଛି ଗୁରୁମନ୍ତ୍ର ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ମଙ୍ଗଳବାର ସଂସଦର ଲାଇବ୍ରେରୀ ହଲରେ ବସିଥିଲା ବୈଠକ । ମୋଦି କହିଥିଲେ, ଅଧିବେଶନ ସମୟରେ ସମସ୍ତ ସାଂସଦ ଉପସ୍ଥିତ ରହିବା ଆବଶ୍ୟକ । ଯିଏ ଉପସ୍ଥିତ ରହୁନାହିଁ, ସେହିଦିନ ସନ୍ଧ୍ୟା ଭିତରେ ହିଁ ଜଣାଅ । ବର୍ତ୍ତମାନ ଦେଶରେ ଜଳସଙ୍କଟ ଦେଖାଯାଉଛି । ତେଣୁ ଏ ଦିଗରେ ମଧ୍ୟ କାମ କରିବାକୁ ପଡିବ । ସେହିପରି ସରକାରୀ ଯୋଜନାର ସଫଳ ରୂପାୟନ ଦିଗରେ କାମ କରିବାକୁ ସାଂସଦଙ୍କୁ କହିଛନ୍ତି ପ୍ରଧାନମନ୍ତ୍ରୀ । ଏପରିକି ନିଜ ନିଜ ନିର୍ବାଚନ ମଣ୍ଡଳୀରେ ନୂଆ କିଛି କରିକି ଦେଖାଇବାକୁ କହିଛନ୍ତି ।
ବୈଠକରେ ମୋଦିଙ୍କ ବ୍ୟତୀତ ଗୃହମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ବୈଦେଶିକ ମନ୍ତ୍ରୀ ଏସ. ଜୟଶଙ୍କର ପ୍ରମୁଖ ସାମିଲ ହୋଇଥିଲେ ।