ନୂଆଦିଲ୍ଲୀ: ଦିଲ୍ଲୀ ବିଶ୍ବବିଦ୍ୟାଳୟ ଛାତ୍ର ସଂସଦ ନିର୍ବାଚନ ଫଳାଫଳ ଘୋଷଣା ହୋଇସାରିଛି । ନିର୍ବାଚନରେ ଆରଏସଏସର ଛାତ୍ର ସଙ୍ଗଠନ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ତିନୋଟି ପଦରେ ବାଜିମାତ କରିଛି । ଅନ୍ୟପକ୍ଷେ କଂଗ୍ରେସର ଛାତ୍ର ସଙ୍ଗଠନ ଏନଏସୟୁଆଇକୁ କେବଳ ଗୋଟିଏ ପଦରେ ସନ୍ତୁଷ୍ଟ ହେବାକୁ ପଡିଛି ।
ବିଶ୍ବବିଦ୍ୟାଳୟରେ ଏବିଭିପି ସଭାପତି ସହ ଉପ ସଭାପତି ଓ ଯୁଗ୍ମ ସମ୍ପାଦକ ପଦବୀରେ ବିଜୟ ହାସଲ କରିଛି । ସେହିପରି ଏନଏସୟୁଆଇ କେବଳ ସମ୍ପାଦକ ପଦରେ ବିଜୟୀ ହୋଇଛି । ଏବିଭିପିର ସଭାପତି ପ୍ରାର୍ଥୀ ଅକ୍ଷିତ ଦହିୟା ବିଜୟୀ ହୋଇଛନ୍ତି । ଅକ୍ଷିତ 19 ହଜାର ଭୋଟରେ ବିଜୟ ହାସଲ କରିଥିବା ଜଣା ପଡିଛି । ସେହିପରି ଉପସଭାପତି ପଦରେ ଏଭିବିପି ପ୍ରାର୍ଥୀ ପ୍ରଦୀପ ତମ୍ବର ଓ ଯୁଗ୍ମ ସମ୍ପାଦକ ପଦରେ ଶିବାଙ୍ଗୀ ଖରଓ୍ବାଲ ଜିତିଛନ୍ତି । ଅନ୍ୟପକ୍ଷେ ସମ୍ପାଦକ ପଦରେ ଏନଏସୟୁଆଇରୁ ପ୍ରାର୍ଥୀ ଥିବା ଆଶିଷ ଲାମ୍ବା ବିଜୟ ହାସଲ କରିଛନ୍ତି ।
ଡିୟୁଏସୟୁ ନିର୍ବାଚନରେ 39 ପ୍ରତିଶତ ମତଦାନ ହୋଇଥିଲା । ମତଦାନ ପାଇଁ 52ଟି କେନ୍ଦ୍ରର ଗଠନ ହୋଇଥିଲା ।