ନୂଆଦିଲ୍ଲୀ:ଆତଙ୍କବାଦୀଙ୍କ ପେଣ୍ଠସ୍ଥଳୀ ପାଲଟିଥିବା ପାକିସ୍ତାନ ଉପରେ ଭାରତୀୟ ବାୟୁସେନାର ମୁହଁତୋଡ ଜବାବକୁ ନେଇ ସମସ୍ତେ ତାରିଫ କରୁଛନ୍ତି । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଭାରତୀୟ ବାୟୁସେନାର ପାଇଲଟଙ୍କୁ ସାଲ୍ୟୁଟ କରୁଛି ବୋଲି ଟ୍ବିଟ କରି କହିଛନ୍ତି ।
ସେହିପରି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜିରିୱାଲ ମଧ୍ୟ ବାୟୁସେନାର ପାଇଲଟଙ୍କୁ ଧନ୍ୟବାଦ ଦେଇଛନ୍ତି । କହିଛନ୍ତି, ପାକିସ୍ତାନରେ ଆତଙ୍କବାଦୀଙ୍କୁ ମୁହଁତୋଡ ଜବାବ ଦେଇଥିବା ଭାରତୀୟ ବାୟୁସେନା ପାଇଁ ଆମେ ଗର୍ବିତ ।
ଉତ୍ତରପ୍ରଦେଶ ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ମଧ୍ୟ ଭାରତୀୟ ବାୟୁସେନାକୁ ସାଲ୍ୟୁଟ କରିଛନ୍ତି । ଏଭଳି ସାହାସିକ କାର୍ଯ୍ୟ ପାଇଁ ଧନ୍ୟବାଦ ମଧ୍ୟ ଜଣାଇଛନ୍ତି ଅଖିଳେଶ ।
କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ ମଧ୍ୟ ଟ୍ବିତ କରି ଭାରତୀୟ ଯବାନଙ୍କୁ ତାରିଫ କରିଛନ୍ତି । ଉରୀ ଚଳଚିତ୍ରର ଏକ ଡାଇଲଗକୁ ଟ୍ବିଟ କରିଛନ୍ତି କେନ୍ଦ୍ରମନ୍ତ୍ରୀ । କହିଛନ୍ତି, ''ୟେ ମୋଦି କା ହିନ୍ଦୁସ୍ତାନ ହେ, ଘର ମେଁ ଘୁସେଗା ଭି ୱୌର ମାରେଗା ଭି । '' ଆହୁରି ମଧ୍ୟ ସେ କହିଛନ୍ତି, ପ୍ରତି ବୁନ୍ଦା ରକ୍ତର ହିସାବ ନିକାସ ହେବ । ଏହା ଆରମ୍ଭ ମାତ୍ର । ଦେଶକୁ କେବେ ବି ତଳେ ପକାଇବାକୁ ଦେବୁନାହୁଁ ।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ଭାରତୀୟ ବାୟୁସେନାକୁ ପ୍ରଂଶସା କରିଛନ୍ତି । ଭାରତୀୟ ବାୟୁସେନାକୁ ନୁଆଁ ନାମ ଦେଇ କହିଛନ୍ତି ଏହା ଇଣ୍ଡିଆନ ଆମେଜିଙ୍ଗ ଫୋର୍ସ ।
କେନ୍ଦ୍ରମନ୍ତ୍ରୀ ବିଜୟ କୁମାର ସିଂହ କହିଛନ୍ତି, ଭାରତକୁ ହଜାରେ ଟୁକୁଡା କରି ରକ୍ତ ବୁହାଇବା ପାଇଁ ପାକିସ୍ତାନ ଚାହେଁ । ହେଲେ ଜାଣିବା ଦରକାର, ଭାରତ ପ୍ରତି ହମଲାର ଯବାବକୁ ଦୃଢରୁ ଦୃଢତର ଭାବରେ ଦେବୁ । ଏହାସହ ସେ ଭାରତୀୟ ବାୟୁସେନାକୁ ଧନ୍ୟବାଦ ଦେଇଛନ୍ତି ।
